文＠Celia Fung
圖＠Justina Genie Pao
話說，當筆者係間café食緊野打緊字既時候，有三位基督徒女士搭枱，一開始既時候佢地都好自然地會祈禱表示「感謝主賜我們飲食」，食到差唔多，佢地三位想轉個鬆動少少既位置坐，就叫個待應幫手搬野過去，其實我已經望住左其中一位女士食淨左四分一既意粉放左係度好耐，接住落黎令我最驚恐既句子終於由佢口中出現：「唔要啦唔該收埋佢…」
我而家先知，原來我把口係郁得快過我個腦，下意識衝口而出左一句：「吓你唔要啦？」
佢地三位當然望住我呆左一呆，話：「係呀，做咩事？」
我用極度憂鬱既眼神望住佢，再望住牒野講：「你地頭先唔係先多謝完主賜你地飲食… 咁你而家咪浪費緊主賜俾你既飲食… 主都應該幾失望…」
之後佢羅返牒野，話：「我一陣再食」，由於佢地坐得我太遠，我已經冇能力跟進究竟佢有冇真係食哂牒野令到上帝覺得真係無嘥米飯
＃其實上帝除左叫人參選之外會唔會叫人唔好食剩野
＃一方面感謝完另一方面又掉走佢究竟係咩玩法
＃可唔可以言行合一少少
＃筆者最好都係自己坐一人枱食飯自己同大家都無咁大壓力
＃利申筆者真係冇拍片冇發脾氣仲係好溫柔咁溫馨提示佢可以下次叫少意粉
後記：其實事主有解釋因爲攤凍左，而佢喉嚨有事食凍野唔係咁好所以就唔想食埋佢，但我亦再次溫馨提示佢試下叫廚房幫手整返熱佢，始終小店都應該有人情味同靈活度較大。當然如果明知喉嚨唔舒服食唔到咁多都應該可以一開始叫少意粉同快快手食左佢先慢慢傾計，可以解決既辦法其實好多，浪費食物絕對唔係唯一出路。
完。