近排菲律賓爆出掃毒黑警綁架殺死韓商事件，令好多南韓人對菲律賓好感到極速下降，再一次證明菲律賓黑警及成個社會有幾腐敗。講起南韓人去菲律賓工作，菲律賓嘅官方足球聯賽United Football League（UFL）入面都有唔少南韓球員嘅身影，去菲律賓搵食嘅南韓球員大部分都係未踢過經典K聯賽及挑戰K聯賽，多數只踢過第3、4級聯賽，甚至只踢過大學隊，不過2017年去菲律賓搵食嘅南韓球員數目將會大大減少，因為以半職業為主嘅UFL已於上年劃上句號，過往UFL試過不限外援，因此成為唔少質量一般嘅海外球員去到碰運氣嘅聯賽，後來不停削減外援名額，上年規定正選位置外援只可以出3+1，其他7個正選位必須出菲律賓本土球員。
到咗今年，新辦嘅Philippines Football League（PFL）會喺4月開波，雖然Loyola Meralco Sparks、Ceres、Kaya、Global已經係職業球會，但嚴格上UFL並非職業聯賽，有部分球隊以半職業球員作班底，呢個PFL唔同之處就係全職業，有新制度，有主客，有季後賽，外援名額得4個，再唔係註9註7，再唔係屈死喺馬尼拉踢，再唔係踢完南韓中學校隊都可以去搵落班落嘅聯賽，再唔係學生哥賺外快嘅聯賽。暫時PFL有7支球隊參加，包括Loyola Meralco Sparks、Global Queen City、Ceres-Negros、JP Voltes、Kaya FC-Makati、Stallion-Laguna及Green Archers United，Ceres-Negros會用返西內格羅省首府巴科洛德做根據地，Global Queen City就會以宿霧市做根據地，Kaya FC-Makati就以馬卡蒂做根據地，Loyola Meralco Sparks、JP Voltes、Green Archers United就以達義市、比南、碧瑤市做根據地，但除咗Ceres-Negros，唔知其他球隊有冇足夠「地方性」，過往UFL如同馬尼拉聯賽，入場球迷唔多，有2000人已算多，但冇「地方性」嘅球隊強行安排一個根據地作為自己主場，一定要付出好多心血去宣傳，事關冇「地方性」，當地人應該唔會無啦啦入場，如何令球迷走入球場係個大挑戰，最近Global踢亞冠外得1200人入場，比上年河內對傑志嘅1500人更少。
究竟新職業可唔可以令菲律賓足球更上一層樓要持續觀察，但對於本土出生嘅青訓品嚟講，如果得7隊基本上冇咩空間畀到佢哋，因為正選大多數都係海外返歸嘅血統球員佔有。