28/2 上環
天光 Ride 港島線完工，九龍線翌年通車
姚松炎：只要你恆常出嚟踩，司機就會習慣
去年十月起，Bike the Moment 與立法會議員姚松炎，聯手於港島發起天光 Ride，招聚同好，結隊踩單車返工放工，迄今四個月，參加者逾百人，證明單車代步切實可行。
然而社會的配套，市民的心態，有沒有同步並進？如是計畫才能推及港九，得到保障和尊重。
Chloe
問：參加了幾多次天光 Ride ？
Chloe：大約十幾次。
問：參加了天光 Ride 後有何感受？
Chloe：希望繼續爭取道路平權，單車應該成為日常代步的工具，同汽車一樣。
問：活動期間有沒有困難，例如被司機蹧躓？
Chloe：實有啦，例如特登過嚟壓你，其實係無冇必要嘅侵犯。
問：你會怎樣說服司機，單車都是道路使用者？
Chloe：李慧詩都講過，單車同汽車係一樣架。唔好咁盲塞覺得四個轆勁過兩個轆。減碳應該由自己做起。
Hughes（Bike the Moment 主編，髦民士多老闆）
問：發起了天光 Ride 後有何感受？
Hughes：過去頂多一兩朋友夜晚操車。第一次行動時，都唔知結果會點。而家踩左四個月，行左廿幾次，真係聚集到班人，改變左佢地對單車嘅觀感、踩單車嘅模式。希望慢慢做落去，改變到更多人。
問：返工時車比較少，但夜晚放工會否比較難？
Hughes：車係多啲，但只會影響某啲位，比如英皇道等，其他地方早晚都差唔多。只要 keep 住整齊隊形，就可以暢順完成。
問：活動期間有沒有困難，例如被司機蹧躓？
Hughes：有呀。點解會有呢種情況？一來係教育，政府灌輸咩概念畀司機？另一方面，道路嘅設計係咪已經過時？香港雖然係一線嘅已發展城市，但規劃仍需要改善。
問：將來會否恆常舉辦？
Hughes：參加者已經開始自行組隊。希望下年能夠延伸到九龍，搵到熟路嘅人帶隊。
但最終嘅目標，係冇我地存在，大家都可以自己踩，咁先有意思。開始係比較難，要激發到大家自行實踐，需要一個過程。
Edmond
問：參加了幾多次天光 Ride？
Edmond：六七次左右。
問：參加了天光 Ride 後有何感受？
Edmond：踩單車可以感受到真正香港。當你唔喺汽車裡面，抬頭望到朝早嘅晨光，你會發覺香港其實好靚。就算唔踩單車都試吓行吓，原來中環冇車嗰陣係咁好。
問：活動期間有沒有困難，例如被司機蹧躓？
Edmond：香港司機百分之七十都唔多友善，覺得單車阻住我，忘記單車都係交通工具。
問：你會怎樣說服司機，單車都是道路使用者？
Edmond：我覺得由政府做嘢更好，係電視同活動直接啲去講，單車係 OK 嘅。衝突一定會有，點樣融合就要靠政府出手。
姚松炎
問：參加了幾多次天光 Ride？
姚松炎：逢東行線我都參加，大約八次。
問：返工時車比較少，但夜晚放工會否比較難？
姚松炎：你問吓佢地。冇問題，好順。
問：活動期間有沒有困難，例如被司機蹧躓？
姚松炎：一架車就會俾人鬧，但多啲車就冇事架喇。
問：將來會否恆常舉辦？
姚松炎：夏天冇辦法唔停，因為太熱，香港嘅辦公室好少有淋浴設備，唔係個個可以踩單車返工，但一到秋涼就得。
問：你會怎樣說服司機，單車都是道路使用者？
姚松炎：唔駛架。只要你恆常出嚟踩，佢地就會習慣。問題不過係唔習慣，就好似三色回收桶，最初出現好似阻住，過左兩個月你就會覺得應該係度。
香港太耐冇人踩單車，司機先會覺得阻。只要你肯出嚟踩，佢地就會明白單車亦係道路使用者。
