印尼總統盃今晚踢決賽，由 Arema FC 對 Pusamania Borneo FC，贏到呢隻盃除咗有豐厚獎金外仲係各隊試陣試外援嘅好時機，今年印尼足協強制liga 1（印尼頂級聯賽）各隊喺U23球員方面註5出3，35歲以上球員只可註冊3個，呢個青化政策引起熱議，有支持有反對，有3字出頭嘅球員膽心前路，不過總射手諷剌地係35歲以上嘅陀地，佢就係 Cristian Gonzáles（干沙利斯），原籍烏拉圭嘅前鋒。
干沙利斯喺烏拉圭蒙特維多出生，1994-1996年代表過烏拉圭U20國家隊，同期戰友有 Álvaro Recoba（列高巴），不過當時出任攻擊中場嘅干沙利斯就冇列高巴咁好彩，最初只能喺烏拉圭甲組球隊 Sud América（美洲南基）做大後備，2000年轉會加盟 Deportivo Maldonado（拉科魯尼亞馬爾多納多）先有多啲上陣機會，唔少同期戰友已經成為大國腳，甚至成為世界知名球員，但干沙利斯依然係一個喺烏拉圭藉藉無名嘅球員，依然要喺烏拉圭甲、乙組之間浮沉，2002年干沙利斯喺烏拉圭認識咗一名能操西班牙語嘅印尼女子，佢對呢位叫Eva嘅印尼女子一見鍾情並展開追求，2003年更與Eva一同來到印尼生活，順道揾班落，結果成功加盟一支蘇拉威西球隊 PSM Makassar（望加錫），改打前鋒，首個賽季就射入27球，協助望加錫奪得亞軍。
2004年，干沙利斯因為火爆嘅性格累事喺一場比賽完結後打人而被重罰，受到呢啲不利因素影響呢個賽季干沙利斯嘅表現亦不如理想。2005年事件解決後干沙利斯加盟另一支東爪哇球隊 Persik Kediri（佩斯克），全季射入咗25球協助佩斯克奪冠，經歷咗一生第一個聯賽冠軍，2006年又為佩斯克射入29球。2007年在射入32球，並喺亞冠盃對浦和紅鑽嘅比賽中射入2球。
干沙利斯喺當時已經成為印尼聯賽當紅人物，但操守非常有問題，喺2006年對 PSIS Semarang嘅聯賽中，干沙利斯襲擊對方球員 Emanuel de Porras，2007年對 Pelita Jaya（佩利達）嘅聯賽中向裁判吐口水，2007年及2008年又衰打人，但判刑卻非常奇怪地輕。到2008年，佩斯克因為財政問題而將干沙利斯租借到西爪哇著名大球會 Persib Bandung（萬隆），最後正式簽約成萬隆球員，3年間都為萬隆貢獻咗41個入球，比唔少外援犀利。 由於喺印尼有家庭而且能夠操一口流利印尼語，加上有一定入球能力，所以早就有人游說干沙利斯入籍印尼，最終喺2010年正式歸化成功，成為史上第一位歸化印尼嘅外援球員，並喺印尼國家隊身上取得11個入球。
2011年，干沙利斯加盟另一支婆羅洲球隊 Persisam Putra Samarinda（佩斯森），射入咗18球，2013年以36歲之年轉投大球會Arema（阿雷馬），與巴西前鋒 Beto 及前港甲外援基夫合組『老人鐵三角』，最後射入咗19球，成為阿雷馬首席射手，到咗上年佢威力大減但都有15個入球，今年總統盃4強對 Semen Padang 連入5球協助阿雷馬打入決賽，雖然就快41歲但依然屈機，咁就證明35歲以上嘅球員只要有料係唔使怕畀人淘汰，不過40歲仲屈機真係唔多。