尋晚(31/1)朗屏村惠州公立小學發生左一場叫做「元朗橫洲第一期公營房屋發展計劃與居民及有興趣人士會面」，我仲以為係諮詢會，原來係會面黎咋，係政府開始搞橫洲呢個公屋計劃多年後，第一次見將要被迫遷嘅村民呀！咁政府就好「隆重其事」啦，請左好多保安呀，警察呀，各大傳媒都來全程影住，仲有著名嘅主持人謝志峰主持會面添。
政府單方面決定會議流程，與會人士要登記、拎籌、抽籤發言。每人兩分鐘，官員可等五人發言後先回答，呀謝生一來就叫大家記得攞籤抽，放落工作人員個抽獎箱到呀！（官員要聽巿民意見天公地道，我抽到機會發表意見仲要當係中左獎呀？）村民一開始要求取消呢個安排，因為大家苦等左多年先等到見官機會，兩分鐘發言點講得晒想講嘅說話？再加上也怕政府抽籤做手腳，扼殺村民發言機會呀！謝志峰最初一直唔肯，直到有立法會議員到場，梁耀忠向謝志峰提出相同要求，取消抽籤，想發言的輪流發言，不限時發言，官員即問即答，謝志峰又即刻應承喎，仲唔係當無權無勢嘅村民無到？
好喇，到個會真係進行期間，佢都一直不停衝出黎幫官員擋駕。大家都知香港政府官員有個最強技能，就係錄音播帶功能，無論你問咩，佢都會答番你佢背左嗰幾行答案，尋晚嗰幾個仲成日強調自己只係技術官員黎嘅添！（技術官員唔駛用腦唔駛溝通？你派個唔識溝通嘅官黎同村民見面？）咁有與會者就問，好喇，你技術官員，咁你可否技術上答我，是否可以做到俾村民不遷不拆？（大意）啲官都未答，呀謝志峰就話：「啲官係答唔到啲咁高層次嘅問題嘅。」台下的我們：「哇！！！」你會唔會離譜左少少呀？
會面其間官員經常答非所問甚至講大話，令台下村民嘩然，某一次台下村民鼓噪，謝志峰話：「啲官坐喺度好辛苦架！」。我地真係忍唔住屌出黎，喂你收錢做嘢架，你估你做義工服務緊我地呀？而家封建年代呀有官見我地要跪低謝主隆恩呀？
中間真係有太多令人憤怒嘅發言，不能盡錄（或者大家記得再補充），更令我地一度大叫口號：「謝志峰！收聲！謝志峰！收聲！」唔知佢是否老羞成怒，竟然喺度大叫「我係有權咁做架！」喂你好似係請番黎嘅主持人喎？你係政府官員咩？你邊個部門呀？
最後與會者要求在坐的地政、房署等官員應承村民，一日運房局局長張炳良不落黎見村民，地政就不可以入村開工（哇會上有村民話有片為證，地政人員話自己係記者、親戚、仲要爆人門鎖入人屋企唔知做乜架！）。地政官員多次話：總之無指示嘅我地就唔會停止收地工作。一直唔肯應承村民要求，咁村民就要求佢即時打電話俾張炳良局長，快快脆脆講清楚啦。喺呢個時候，謝志峰話：「你地唔係咁做嘢架，打電話邊得架，你地應該同阿忠（梁耀忠）番去寫封信俾局方。」喂阿哥，其實你到底係邊位呀？仲要你教我地點做？村民信都唔知遞過幾多封啦！林鄭都有接過添呀！之後場面一直僵持不下，佢竟然話：「我係唔會俾啲官打俾局長」，重覆左兩三次。
喂，原來你先係新任特首呀？我真係唔知呀！
就算無左呢個主持，個會本來就係極荒謬，財委會都撥左款通過橫洲計劃，你啲官先第一次去開會同村民見面喎？啲官仲面不紅耳不赤話呢個係「行之有效」嘅系統喎。朱凱迪同姚松炎兩位議員提出有個新嘅替代方案，可以不拆遷橫洲，又可起雙倍公屋，希望政府能坐低傾下可能性，房署個官一開口就話我地已經研究左，你個計劃係唔得嘅！（你咁快就研究左？你開會傾下都唔肯？）官又話有開過21次會見過反對人士，但馬上被人撐穿嗰啲諮詢係針對一個道路工程，唔係橫洲起公屋呢件事喎！明明之後仲有刊憲期，個地政仲話其實啲程序已經做好晒，無得反對喎？咁啲村民到底喺幾時，邊度被諮詢過呢？就係尋晚嗰個會囉。就係咁赤裸。
仲要請個謝志峰番黎幫官擋駕捱刀，轉移視線，兩個半鐘會，講得最多嘢嗰個就係謝志峰，佢係邊位呀？其實由個會一開始佢講嘅嘢就明白了，佢話：「明白受呢啲發展項目影響嘅村民，難免會係有啲焦躁嘅」（大意），其實佢一開始就唔當村民嘅訴求係訴求，你地都係情緒大啲嘅維園觀眾啫。到最後咪就係見勢色唔對路，仲幫啲官員搵路走囉。他這個人的存在正正反映政府搞這場會不過是開show，找個謝志峰來開個城巿論壇各打個五十大板，製造假開明表象，實則更強力地收窄巿民發言權。
呢啲錢咁好搵，睇怕大家以後去政府啲會有排要對住謝志峰，做唔到啲咩都要寫低幾隻字洩憤。
#橫洲黑幕
#官商鄉黑
#不遷不拆