有朋友抱怨FB被鄭俊弘的戀聞洗版，慨嘆香港人寧願炒花生都唔關心政經大事。
查實娛樂大過天，向來是普遍現象。人有八卦的需要，喜歡聽故事，所以小說和電影歷久未衰。明星/名人的私生活更加吸引人，它除了滿足人的偷窺慾，亦是最容易和親戚朋友在閒聊時產生火花的共同話題，而且無傷大雅，消費完轉頭就無件事。大眾有太多可望而不可即的慾望，將之投射到名人身上，既羨慕又妒忌。知名人士有甚麼威水史、風流史，讀者就算代入不到，至少可以開開眼界；威水人物一旦PK，觀眾馬上一沈百踩：「抵你有今日」、「睇下你點死」、「有咁耐風流就有咁耐折墮」，充分享受打落水狗的樂趣，心理上補償作為平凡人從未威過之遺憾。
專制的管治者，其實樂於看見娛樂事業的蓬勃發展。一來多些人少理政事，佢地受的監察也少，反對力量就唔容易集合起來搞對抗；二來社會大眾有了精神寄託，不滿情緒有了一個不會影響管治的出口，當然有助整體的和諧，溫水煮蛙也容易D。
話雖如此，鄭俊弘呢單新聞爆得起，都有正面啟示：原來香港的娛樂圈仲未徹底收皮，港產歌星仲有被談論的價值。唔知咁樣算唔算係一件值得高興的事呢？