北非國家突尼西亞嘅突尼西亞足球甲組聯賽進入Championship階段，今晚有一場大戰係由排第2嘅沙希爾星隊對排第1嘅艾斯柏蘭斯，由於2隊實力接近又係勁旅，所以呢場比賽有唔少球迷非常期待，雖然影響力不及Tunis derby「非洲人對艾斯柏蘭斯」，但沙希爾星隊及艾斯柏蘭斯2隊球迷都出名投入激情，球迷亦成為比賽另一焦點，現場氣氛絕對唔差得過意甲同西甲部分賽事。
講返呢2隊波，艾斯柏蘭斯及沙希爾星隊同樣擁有大量突尼西亞國家隊球員，例如國家隊首席門神Aymen Mathlouthi就係效力沙希爾星隊，現時效力西甲華倫西亞嘅突尼西亞後防Aymen Abdennour都效力過沙希爾星隊，而國家隊快翼Fakhreddine Ben Youssef現時效力艾斯柏蘭斯，其實可以咁講，突尼西亞國家隊球員主要分外流及本土2派，入選國家隊嘅本土球員主要來自艾斯柏蘭斯、沙希爾星隊同非洲人3支球隊。
突甲喺非洲算係發展得比較好嘅職業聯賽，但係同好多非洲國家職業聯賽一樣大部分外援都來自非洲，例如阿爾及尼亞現役國腳Hicham Belkaroui及Mokhtar Belkhiter現時效力緊艾斯柏蘭斯同非洲人，你仲可以搵到利比亞國腳蹤影，除咗北非國家，亦有外援來自科特迪瓦、尼日尼亞、幾內亞、塞內加爾及毛里塔尼亞等其他非洲國家，好似效力沙希爾星隊嘅巴西前鋒Diogo算係突甲中嘅另類。
非洲國家職業聯賽未能吸引大量外洲球員前來有好多因素，包括錢財及生活保障問題，不過細心一看突甲入面有唔少球員來自法國，不過清一色係法國出生嘅突尼西亞裔民。