題為編輯所擬
圖：場內廿幾個桶，不停掉不停掉不停掉，係咪大家已經覺得理所當然所以無視呢個咁恐怖既實況？
唔係執垃圾我都唔會去青衣大戲棚。
但係網上見到有心人召喚搵人幫手做回收，又回想起之前攪七一綠色遊行個種極度渴求有義工有心人幫手既感覺，明知去到負能量會極大都忍唔住羅苦黎身。
廢話真係唔多講，基本上個度D垃圾多得幾恐怖幾離譜幾嘔心幾不知所謂大家都心裡有數，仲要會場基本上只有廿幾個大既660L垃圾桶俾大家掉垃圾，係零回收桶之下，所有有用無用既野全部都俾呢廿幾個桶食哂。(不過，即使有回收桶又點，根據之前咁多個大型活動放回收桶既經驗，回收桶咪又係俾大家當係垃圾桶咁亂9咁掉。)
圖：好努力沖洗的義工朋友們ssssssss
Initiate 呢壇野既攪手都真係好有心，佢地搵左個位置近廁所方便集中同清洗所有收返黎既回收物，而佢地亦都事前聯絡左有興趣收既回收商收左d膠兜膠樽，確保收返黎洗完既野有個好歸宿，可以用黎塞住個D成日話「所有回收左既野咪又係掉落堆填區」既人把口而無藉口唔回收。
而攪手同其他朋友亦都好有禮貌地係場地外圍作出呼籲，鼓勵入場者入場「一籤一兜多用」同埋將回收物交俾我地，亦有D「執垃圾小隊」穿插場內每個垃圾桶執返D回收物同有用物資上黎，再運返去廁所位清洗。
但係基於我撩事鬥非既性格，就咁係度執我執到我個心好似穿左個窿咁，一路執又一路唔忿氣 ， 最後我都係忍唔住，主動出擊，捕係個垃圾桶附近，一見到D人行埋黎掉垃圾就黎一個獅吼功喝住佢再一秒變臉報以甜美笑容:「你會再食既話不如keep住個兜再用黎食多幾檔先掉啦好無啫？ (bling bling眼mode is on)」
圖：香港人真係好叻，即使滿左都總會有方法死塞爛塞或疊高上去，都唔願意諗方法點樣減少舊垃圾黎減輕清潔工既負擔，都係個句啦，我黎食野jar ma, 理得你死jei
其實我覺得呢招係唔錯既，個結果係出奇地好，實例包括：
有數個金毛男、青春少艾、中年阿叔以及學生妹，諗左幾秒我講既野，再願意羅返起個紙兜發泡膠兜返返轉頭去第二間鋪頭買野食 (我希望佢地唔係嫌我煩而選擇行去另一邊個垃圾桶掉走佢)；
圖：每次摷垃圾身邊既人都會投來好奇目光，其實我唔介意你望，但可唔可以唔好一路望一路掉回收物出黎 (而明知我地收緊回收物)黎加重我既負擔同怒氣呀頂你
另外亦都有幾位市民係個刻口頭承諾下次會自備餐具黎買野食 (雖然我唔會認得返你地係邊個但我希望你地遵守承諾唔會冇口齒呃中女) ;
亦感謝個位被我喝止左既女士，係掉完雞骨羅返個膠兜大大聲喝返我轉頭：「係咪連掉雞骨都唔俾！? 我連枝竹籤都用返架你望下你望下！」
成個人釘人戰術樣係樣衰D，但起碼有成效既野我又唔介意做，點醒左十幾個人令佢地重用個兜減少用多十幾個兜，又或者令佢地個心有一絲愧疚下一次會主動再做多D，呢個長遠投資我又覺得做得過喎。
呀，仲有多謝個位怕羞唔想上鏡而又自備餐具去掃街的女士，你令我鼓舞左一晚。
圖：其實青衣大戲棚隔離行幾分鍾已經有洗手間，所以真係唔洗驚自備餐具要污污糟糟咁走，沖一沖完水個盒羅返屋企又係一條好漢
#其實我真係唔會晚晚係度捕住大叫作出溫馨提示大家可唔可以幫手自律少少行多步
#即棄餐具其實唔係真係需要即棄你唔洗咁聽話用一次就掉
#聞說自備餐具既寶貝係有獎勵老細會俾多幾舊野食你
#今晚最後一晚如果大家去不妨做多少少好無