今日明報都出左，就係民間學院收到警告信，話我地非法辦學。由於擔心法律責任同影響本土研究社的工作，學院課程已經停晒。
今次事件都有好多朋友表示支持，我都趁機又講下呢兩年究竟民間學院想做乜。好多人民間辦學，但我地其中一個特別之處，就係我地收學費。咁都係特點？係，因為我地想收返學費，比返老師。我地希望民間學院的老師唔係義工，而係一份正式的工作。久而久之，年輕學者可以透過民間辦學，幫補生計。最終目標，係實現民間學術圈的經濟自主。簡單講，就係唔使靠政府、大學、大商家，學者都可以獨立生活。我地都係相信，有獨立的經濟先有研究同學術的自主，可以有屬於本土同民間的知識生產。呢D知識同學術，永遠都會立根於民間。(頭盔：當然，我地唔係大口氣到覺得民間學院先有學術自主。但有個開始，有堅持民間學術的人同空間，咁或者學院入面的老師都會容易D。)
另外，為左推動呢個民間學術圈，我地又搵左一班年輕學者返來，一齊攪左份民間學術期刊，叫世界mundi。因為我地相信，學術、認真的討論，唔係只係屬於正式學院，而係屬於民間。份野剛剛出左啦。如果大家有興趣，都可以上序言搵下。
點解要攪民間學術呢？因為一個城市有思考，有力量，佢就會有學術。呢D唔係學院懶高深用來撻朵的學術，而係立根於生活，貫徹於行動的學術。香港人要行落去，就會有人搵行落去的方法。去搵方法行落去，就係民間學術。