尋日01體育有篇前香港足球員馮嘉奇專訪，「馮奇」感嘆香港球壇十年如一日，亦曾提及自己當年辛酸，甚至自爆為年輕球員謀福祉，同高層商討時竟然得到回應：「唔夠問你阿媽拎」，慨嘆足球員尊嚴何在？
資深球評人黃桂興「桂神」亦參與討論，但桂神嘅言論實在令人失望，一句：「好好利用24小時，搵唔夠就搵PT幫補」更係惹起公憤。
黃：「我1974年當中學敎練人工HKD1000元我1979年做東方及黃文偉助敎人工HKD500元。如果我放棄、我抱怨、我還可以在2017年仍然當足球總監及評述員等多元化工作嗎？年青人：事在人為正面向前望、理想才會成真的！」
70年代嘅$1000，又係即係等於今時今日香港幾多錢？根據網民留言，指「70年代初時的呎價僅約140元至150元，換言之，700呎的單位售約10萬元，而當時普羅市民月薪為500元至1,000元，每餐飯不過幾毫」
換句話說，當年$1000月薪，尚算正常，但換轉今時今日，喺食餐飯都要$40-50蚊、連樓都買唔起嘅香港，$4000月薪真係夠使？租個房位又夠唔夠？仲未計部份球員需要養妻活兒、甚至照顧兩老。唔好忘記，桂神你父親係位商人，你亦曾外流讀書，都算叫小康之家吧？亦唔好忘記，70年代香港足球都係一個黃金時期，入場睇波人數萬人空巷，點似依家幾千甚至千幾人？
黃：「好好利用24小時，搵份PT幫補下。唔好投訴或搵籍口！」
假假地，香港都有個職業足球員聯賽。冇錯，好多球員為賺多啲錢而返pt或搞副業，比如一日三份工嘅趙俊傑，但問題當一份職業根本唔夠support球員，點解係勸球員去做多幾份工？而唔係改變呢個歪風，幫球員爭取更多？定你認為$4000已經唔錯？如果根本唔夠Support球員，仲點解叫職業？如你所言，假設只有$4000月薪，加埋獎金，到底一個港超中型班球員會有幾錢個月？
黃：「咁你放棄做專業足球員，返去搵份朝9晚5工」
香港地其實有好多潛質足球員，但好多因為人工、因前途而決定放棄。佢哋唔係唔想堅持，唔係唔肯捱，而係真係捱唔到。香港地真係好現實，好多時都講錢至上，用最快路線搵最多嘅錢，根本係社會問題。係呀，衰極都仲有人留底踢港超，但係咪代表做足球員就一定要預咗人工低？預咗要返多啲PT？唔否認做人要有堅持同熱血，但當現實擺喺面前，熱血真係可以當飯食？09年東亞運足球金牌隊成員又有幾多人已經轉行？連生活都成問題，何來談夢想？
我唔係討厭或針對桂神，而係認為其言論未有為設身處地諗下現今情況，今時唔同往日，唔好下下都講咩『以前我乜乜乜都係咁捱，點解你啲年青人唔得？』香港一直信奉「肯捱肯努力就會成功」嘅獅子山下精神已經唔適用於2017年，有幾多年輕人做到隻狗咁都買唔起樓？幾多人肯努力都唔會有出頭天？你做到，可能係因為你叻，但亦不能忽略當時社會氣氛呢一點。
桂神作為球圈中有地位人士，我希望佢係利用自身力量幫助現今球員，又或者出一分力改變當下球壇情況，而唔係用你舊時一套，放於今時今日，然後叫球員接受現實。