餅，我們諗起曲奇餅，諗起被遊客炒貴咗嘅曲奇餅；餅，又令人聯想起「老餅」，諗起人口老化問題日益嚴重嘅香港。彷彿炒賣係我哋嘅核心價值，彷彿呢個老去嘅城市唔再吸引......但今日要講嘅仍然係餅，一間歷史悠久但唔老嘅懷舊餅店——均香餅店。
遠就唔遠，但你估唔到碩果僅存嘅傳統餅店大隱隱於石硤尾，街坊買餅就唔洗周圍走。你會諗餅店點會碩果僅存？無錯，店主吳先生賣嘅唔係普通餅，而係嫁女餅、嚤囉酥，仲有光酥餅，都係坊間少見嘅舊式餅點，全部人手製造，天天出爐。
吳先生入行四十年，後生時跟同鄉拜師學藝，先學整嫁女餅，再慢慢學整嚤囉酥、光酥餅等餅點。其後開餅店，每日等唔切太陽出嚟就開工，拎起六斤重嘅焗盆出入焗爐，吳先生身壯力健、滿頭黑髮，如果佢唔比身分證你睇，比你目測都只係覺得佢岩岩廿五歲。六十歲？Unbelievable！
目前餅店由佢同太太經營，由日出做到日落，再由日落做到日出。訪問當日，小記九點幾到達餅店，餅店不斷有街坊嚟抖涼傾偈，唱唱「涼風無信，均香有餅......」吳太太提到農曆新年前夕，街坊仲會嚟鋪頭幫佢哋手整油角（又叫「角仔」）。咁多年，吳太太最深刻就係細個拖住媽媽手嚟買餅嘅小朋友，而家長大成人，又帶番自己仔女嚟幫襯，你會發現原來兒時回憶係可以傳承！
吳先生憶述當年菠蘿包賣三毫一個，而家就十蚊三個，同時慨嘆無新人入行，難請師傅。曾有同鄉介紹一位後生仔學師，吳生和吳太視如己出，傾囊相授，教佢製作各式餅點，徒弟去旅行時更送佢大利是，等他多個錢旁身。可惜，徒弟學師一年後就要孤身走佢路。不過就算徒弟離去，吳太依然祝福佢，仲話「最緊要你開心！」。吳太個女打算繼承家業，吳太擔心女兒吃不了苦。吳生寄語時下後生仔要多操練自己，「最緊要肯捱！」，又歡迎後生仔到餅店學師，只要不怕熱、肯捱及肯學就可以！
石硤尾其實仲有大量特色小店，四月尾嘅星期六、日，比個機會自己知多少少社區嘅人同事物，參加社區導賞團接觸下人情小店啦！
