今朝講過東爪哇省球隊Arema（阿雷馬）參加今季印尼甲組（Liga 1），同時都有另一支阿雷馬參加丙組（Liga 3），拆開AB兩隊踢唔同級別嘅聯賽喺世界各地好常見，通常A隊都係主力隊，B隊係預備隊，但印尼球隊情況比較特殊，阿雷馬就係其中一個例子。
現時征戰丙組嗰隊叫Arema Indonesia（阿雷馬.印度尼西亞），其實呢隊阿雷馬.印度尼西亞就係2012年喺亞協盃淘汰傑志嗰隊阿雷馬，與2014年香港球迷睇亞協盃所見嘅Arema Crous（阿雷馬克洛諾斯）嚴格上係兩隊波，不過話佢係同一隊又錯唔晒，究竟點解搞到咁複雜，就要由2008年首先講起。
2008年印尼成立一個制度有所不同嘅全新頂級職業足球聯賽，呢個職業足球聯賽叫做Indonesia Super League，中文叫印尼超級聯賽，簡稱ISL及印尼超，而首屆冠軍係Persipura Jayapura（佩西普拉），不過2010年佩斯普拉代表印尼踢亞冠盃成積就唔太好，作客對住中日韓球隊失咗22球，而踢亞協盃嘅Persiwa Wamena（佩西瓦）都係包尾收場，加上2011年亞洲盃外圍賽及2009年東南亞運動會男足項目都出局，都令好多關心印尼足球嘅人心痛，除咗戰積差劣，不滿印尼足協（PSSI）腐敗無能作風嘅人陸續增加，種種因素下埋下分裂導火線。
2010年可以話係印尼足球黑暗期嘅開始，一班熱愛印尼足球嘅商家及政客認為印尼足協係印尼足球發展阻力，試圖用行動推倒印尼足協，由商人Arifin Panigoro領導出錢出力另搞一個新嘅職業足球聯賽，此舉得到多方支持，結果全新嘅印尼頂級聯賽Liga Primer Indonesia（LPI）於9月成立，與印尼足協旗下嘅超級聯賽ISL對立並存，最初預計有15支新球隊參加，由於制度比較先進，資助較多下令當時3支參加ISL嘅球隊中途退出轉戰LPI，包括係Persema Malang、PSM Makassar、Persibo Bojonegoro（佩斯寶），再加埋本身喺次級聯賽打滾嘅Persebaya，LPI一共有19支球隊參賽，比ISL更熱鬧及火爆。
而阿雷馬當季仲喺ISL作賽，代表印尼出戰亞冠盃因為實力差距包尾出局，加上欠薪事件影響軍情，令聯賽無法衛冕，只獲取2012年亞協盃席位。
由於兩個聯賽自稱官方觸動FIFA神經所以落命令要印尼人自己拆掂數，FIFA當時只承認一個官方聯賽，就係ISL。經過多番討論，LPI一方取得最終勝利，2011-12年度賽季將會係LPI成為FIFA及AFC認可嘅官方足球聯賽，而ISL將會被取代，參加ISL嘅球隊喺11-12賽季會轉去參加LPI。
2011年尾LPI改名為Indonesian Premier League（IPL），預計有24隊參加，但末開波前已經分咗兩邊陣形，多支球隊拒絕加入IPL，而一班支持舊派復興嘅足壇人士唔理違法將ISL復活並成立新足協KPSI，有唔少本身預計參加IPL嘅球隊最後都改為參加不被FIFA及AFC認可嘅ISL，而當時每一支球隊都需要表態，撐IPL（PSSI）定ISL（KPSI）？當然中立係可以嘅，有幾支球隊為表中立就拆開2隊踢2個聯賽，阿雷馬就係其一，本身喺1987年成立嘅原會參加官方認可嘅IPL，另一支新成立嘅阿雷馬就踢ISL，就係咁出現咗2支阿雷馬，一般稱為IPL阿雷馬或ISL阿雷馬。
最初主力都集中喺IPL阿雷馬，ISL阿雷馬就由較次嘅球員組成，但上半季2支球隊都陷入低谷，其中ISL阿雷馬情況比較危險，所以轉會窗打開後阿雷馬會方就安排部分IPL阿雷馬主力去到ISL阿雷馬救亡，雖然IPL阿雷馬人腳大變，但喺亞協盃依然取得唔錯成積，最終聯賽回升返去第三。
去到2013年初IPL繼續係印尼官方聯賽，阿雷馬繼續保持中立，不過季中管理IPL嘅PSSI最終因為各方壓力而同KPSI談判，最終決定2014年ISL會變返做印尼官方聯賽，IPL將會瓦解，而PSSI重選主席後KPSI一派人士倒轉頭入主PSSI話事，呢個時候有新作風嘅PSSI就宣布2014年賽季不能容許一拆二嘅球隊，並宣布將參加IPL嘅阿雷馬等球隊釘牌，亦即係阿雷馬喺1987年成立嘅原會被禁止參加官方聯賽賽，而2011年因為表示中立而臨時成立嘅阿雷馬就頂咗原先阿雷馬嗰個身分，由於2014年印尼嘅亞協盃代表資格改為2013年ISL冠亞軍，當時ISL阿雷馬係亞軍所以如期出戰2014年亞協盃比賽，又即係話2014年被傑志喺16強淘汰嘅阿雷馬唔係2012年所見嘅阿雷馬，但同樣都係阿雷馬，唔知你明唔明喇。
由KPSI派掌控嘅PSSI將IPL阿雷馬釘牌原因係因為IPL阿雷馬不能通過賽會批核，唔可以二拆一只係表面原因，實際係想滅絕IPL時嘅任何一切殘餘力量，本身以1987年原會身分參與閙雙胞時期嘅阿雷馬去到最後居然被指係違法球隊，反而2011年因為以表中立而新成立嘅阿雷馬卻成為合法嘅阿雷馬至今，真係非常諷刺。
今届阿雷馬原會終於復牌可以參加丙組聯賽，2011年成立嘅阿雷馬就繼續踢甲組聯賽，大部分阿雷馬球迷都將集中力投放喺甲組，係咪原會參賽似乎對球迷們唔重要，不過若果有朝一日丙組嘅阿雷馬升上甲組遇上阿雷馬，應該都會幾有趣。