每逢過時過節或者有新店開張，都會見到一隊隊醒獅隊的「小鮮肉」拿著勁重的鼓、獅頭，然後著起隊服，好型咁行過，有時唔止會採青，甚至會跳梅花樁。小弟數年前有幸，在港看過一場精彩絕崙的醒獅表演，令我對醒獅完全另眼相看，因為醒獅作為傳統的民間活動，原來也可以刺激和充滿藝術性。
傳統的醒獅分兩種，尤如南拳北腿一樣，醒獅也分南獅北獅。香港和東南亞地區因為天氣較熱，大多人會選擇學南獅，因為北獅的整套隊服一著上身，就足以令你出汗，所以現時香港都是舞南獅的居多，而且還以鶴山派和佛山派為主。除了表演隊服的差異外，南獅和北獅的動作，獅頭的形態皆異，南獅會比較多跳樁的動作，而北獅多在高臺上進行，兩者所模仿的獅子的動作亦大不同。為什麼我會說醒獅某程度係男人的浪漫？因為一班佬一齊去團結以半舞蹈半功夫的形式模仿獅子的形態之餘，仲會係高樁上做出高難度動作，有時都會睇到出汗，但舞獅師傅就氣定神壇（加上愈來愈多後生仔），令小弟都不禁動起凡心。雖說如此，但其實香港舞獅都有唔少女仔，仲會組成女子隊。
而馬拉方面呢？身型碩大的馮師傅就話以前要廿一歲先可以開始學舞獅，但時代不同，馬來西亞由以前法例規定獅子不能上街到現時政府都認同並接受舞獅的民間活動，而當地的舞獅團隊亦會深入不同的中小學中教學，都可算是見證時代的進步。
其實香港一直有不少有心人致力發揚傳統民間的活動，龍舟當然是其中一種（有興趣的朋友可以研究下究竟龍舟係幾時開始的，因為一說中龍舟活動係比屈原更早），而醒獅亦是一種。文明的進步並不是把背後的過去全部壓碎毀壞，而是帶著過去現在邁向將來。正如香港姜氏的醒獅團甚至嘗試加入 Hip-Hop, Beat Box 和 LED 在傳統的醒獅中，目的不是要放棄傳統，而是讓傳統與時代接軌。
P.S. 時代廣場的「國際醒獅節」已開始，由今個星期六起，連續三個周六、日下午都會有表演。聽我講，一場好嘅醒師表演係會令你改觀。