敘利亞足球隊，可以話係世界盃亞洲區12強中，遇到最多困難嘅一隊。
佢哋國內戰亂，球場用作軍事用途，連主場都冇埋，所有比賽要移施中立場／客場，基本上係全作客比賽，尋求協助時更因為政治因素而遭拒，幾經辛苦先搵到阿曼／馬來西亞呢啲地方作賽。
好喇，搞掂比賽場地，但國內戰事頻繁，國民忙於逃離，邊有心情踢波？聽講預選賽期間，有6場比賽係不足23人。好唔好波未必係最重要，夠一隊已經偷笑。
喺一個咁困難嘅情況下，敘利亞竟然都可以突出重圍，先喺預選賽40強脫穎而出，歷史性躋身最後12強；喺12強賽，贏過烏茲別克、中國，亦成功摸和「太極虎」南韓。
尋晚面對同組榜首、已經連續12場比賽不失一球嘅伊朗，佢哋竟然打破對方不失球金身，仲要一入就入兩球，攻入嘅第2球更加係出現於補時階段（補5分鐘，入波90＋2）！
呢球波意義重大，因為另一邊廂同南韓打和嘅烏茲別克，可乘敘利亞落敗而贏得第三名嘅附加賽資格，但敘利亞嘅「補時奇蹟」，最終令劇情峰迴路轉，敘利亞因為呢一分再加得失球反壓同分嘅烏軍晉級，保住參與世界盃嘅希望。
射入呢球波嗰一刻，敘利亞嘅職球員冒住被逐嘅危險衝晒出球場慶祝，好話唔好聽，真係有機會咁樣而紅幾件，但敘利亞球員嗰一刻真係WFC，因為佢哋知道，呢一球嘅意義係比全取3分更加重要！
「The dream is still alive!」
BBC 體育如此形容，佢哋嘅夢直到依一刻都仲未醒，甚至有機會將呢個夢變成真！
四年一度世界盃夢，有邊個地方／國家嘅球員唔想成真？
呢個地方嘅部份地區，因為「伊斯蘭國」影響下，足球成為禁忌，唔少鍾意足球嘅人因此而魂斷槍下，但炸彈永遠都唔會炸散敘利亞人對足球嘅心。
「我們的入球能讓笑容重現在敘利亞人臉上，我們可以在痛苦背後，為他們帶來些微快樂。」
可能喺你眼中，從來冇諗過足球嘅意義，會係一種團結人民、安撫人民嘅途徑，但的而且確，足球就係有呢種超越比賽層面嘅魅力，成為無數人民嘅心靈慰藉，甚至係一種團結人民嘅力量。
足球嘅意義，往往比你想像中大更多！
雖然佢哋附加賽嘅對手係澳洲，贏唔贏到都成問題，但至少佢哋而一刻，全國人民都有會上下一心，一齊去打呢場戰爭以外嘅仗─
〝We played with a united spirit, for Syria, for the Syrian people, for the kids, for all the people.〞－敘利亞球員Mardek Mardkian