參加左「民間土地資源專家組」，感覺到社會對小組成員都有所期望。等我自己申報定先，我個人係堅決反對林鄭借「首置樓」之名，攪官商合營，夾埋幫地產商過1300公頃農地儲備起豪宅，根本係百害而無一利。
剩番30年就到2047年，到時新界農地租契全部會一次過到期，啲地產商開始自覺新界農地土儲冇得再慢慢搣，回歸後已開始逼左曾蔭權林鄭配合著深港同城化搞東北洪水橋，暗中幫佢地釋放左4大地產商手上1/5既農地儲備起豪宅，呢個其實已經係公開既秘密。
近幾年成日見到有啲類似港大黎偉聰鄒廣榮兩個填水塘學者，周不時走出黎發表話要釋放地產商囤左好多地既鄉郊綜合發展區（Rural CDA）、平補地價等地產商釋放農地；上年開始重有個叫團結香港基金，不謀而合又係講同樣既野，你就知背後邊個係佢地老闆。南生圍個類農地儲備地產商開始加入啲「公私合營」元素，同林鄭講既「首置樓」發展方式如出一轍。
依家林鄭咁多地產商捧佢上位，係時候還票債。唔聲唔聲第一次開會已經攝左呢啲明益地產商既建議入政府委任個個「土地供應專責小組」，將啲例如改劃鄉郊既綜合發展區，發展商既農地儲備，統統都扮哂做「社會人士意見」。喂，你係地產商就地產商啦，扮乜野小市民既意見呢？
市民對發展優次既意見好清楚，你係有棕地就用左棕地先，有哥爾夫就用左哥爾夫，無啦啦爛地唔用走去搞綠油油既農地，本末倒置，根本係為左地產利益優先，而唔係真正處理香港人既住屋問題，借啲耳拎「首置樓」綁架民意去益地產商，咩年代呀，唔好以為小市民唔睇報告就可以當佢地傻仔啦，平日普通一個UBER的士司機，見到你講咩都知你個政府之後想點啦。
所謂幫你首置上車盤，就係俾個供廿年樓既「選擇」你，可能得1%既人唔知係咪叫「受惠」，然後就賣個支持佢釋放地產商既新界農地儲備，但係個後果係繼續養肥養大啲鄉紳同地產霸權，成個土地規劃房屋政策繼續俾佢地牽著行，99%既人就繼續喺地產霸權既淫威下如常生活同工作，值得咩？
農地本身就應該農用，唔該用左政府手上自己既儲備、棕地同攪惦人口政策先好講農地郊野公園之類。1300公頃農地如果政府全面徵收，以一屋一田方式俾番市民耕住合一，其實當假設一戶人7000呎（一斗地）有間400呎耕寮，都已經可以俾到一家四口成8萬人有得食有得住，點解唔可以好似咁還地於農，用呢種方式「釋放地產商農地」冇人會反對你，重會得到市民掌聲。
依家唯一解決香港住屋問題只有一個辦法，就係要以各種方法逼使政府同地產商「讓利」（give way），公眾要形成個強大既公眾意向，令佢地要接受香港唔可以再好似以前佢地咁玩法，唔可以再玩打劫小市民壟斷土地規劃個套，依家玩到一獲泡佢地要知道要還要贖罪。等政府一味搵地搵俾自己友，我唔想我一世人都見住香港愈來愈多人住劏房。