現時印尼甲組聯賽仲有5輪就玩完，焦點球隊係警察隊同峇里聯，2支球隊季前不被睇好，現時分別排喺龍頭同阿3，雖然另一支勁旅佩斯普拉急起直追，但2隊表現都仲係令人意想不到，特別係人腳一般嘅警察隊。
但季前大眾目光幾乎集中喺萬隆隊（Persib Bandung）身上，因為有2位前英超球星高爾及艾辛加盟其中，2位嘅名氣令萬隆知名度急升，季初上座率有明顯增加，加上一大班前及現役本土國腳助陣，各方都睇好呢支印尼藍軍可以繼2014年後再次奪得印尼聯賽冠軍。
可惜，現實同期望係兩回事。
萬隆隊開季後成積一直麻麻，喺聯賽長期排喺中游位置，一班前國腳都打唔出應有水準，甚至有回塘積象，少量重要主力都傷晒有排休，只有血統兵Raphael Maitimo一個係每場交到貨，幾位小國腳能力唔錯但經驗太幼嫩，而2位星級外援表現都同大眾預期差好遠，高爾甚至連出場機會都冇乜。
去到今日球隊已經無緣冠軍，雖然降班機會唔大，但作為一支喺印尼有極大影響力嘅球隊，咁嘅情況有死忠堅決唔收貨，早前主場對巴力圖，有死忠發起罷睇，希望球隊管理層正視現存問題，結果只有7千幾人入場，睇開港足可能覺得一場波有7千人入場超多，但對於萬隆嚟講呢個數係完全唔合格，正常一場波可以有萬幾2萬幾人入場，話題對碰就一定超過3萬。
10月17日，萬隆市街頭出現一片藍海，有接近一千位球迷上街，高舉各種橫額，高喊各類口號，今次遊行並冇變成暴力衝突，球迷們只想高層聽一聽佢哋嘅訴求，講到尾都係為球隊，唔係搞搞陣。事實上高層們做過一啲嘢令球迷非常不滿，例如球隊經理時常高調直接指揮，教練如同路人甲廢人一個根本冇話事權，經常性排出怪陣令球員唔習慣，而且唔尊重球員，比如故意安排雪到硬晒嘅高爾出場，然後賽後經理公開話“我專登派佢出場，就係畀大家睇吓，佢有幾廢”，高爾唔掂球迷睇到，但經理說話直接影響外界對印尼足球嘅印象，包括萬隆隊，呢個令部分球迷非常嬲。
除咗管理仲有嘈球員，上仗球隊主場迫和巴力圖，賽後有球迷衝入場痛罵球員，大部分都係喊晒口咁閙，但有個別球員忍唔住走去兇返球迷，令到部分球迷不滿，佢哋就仆心仆命撐你，你就擋佢臭四。
講真，萬隆隊今季非常失敗，有豐厚大水喉，有咁多好波之人，有幾個本土球員年薪過百萬港紙，卻踢到一pat屎，分分周流浪都抽得羸你。不過好彩嘅係，仲有一批肯入場一路追住你屌一路口水鼻涕眼淚流晒嘅上腦死忠留喺到，如果冇人屌你，好似阿雷馬咁話閃就閃即時由2萬幾人落到千6人入場，咁就真係死得，最可怕就係WFC。