頭先見到一篇新聞，話香港吸煙與健康委員會建議政府增加煙稅去誘使煙民戒煙。
加煙稅係咪真係可以令人去戒煙呢？我又唔覺喎。由我細細個有印像開始一包煙賣十幾蚊（嗰陣報紙檔仲有散裝煙賣），到後嚟29、39、50、55、57咁加，升幅拍得住樓市，但咪一樣仍然係周街煙民。冇錯，每次啲煙加價都有一班人話「佢再加我就戒」，喺我以前讀書返便利店兼職嗰陣好多成日嚟買煙嘅人都咁講。但結果我啱啱做嘅時候係39，到後嚟我走嗰陣就算賣到55，佢咪一樣每日過嚟買煙。
香港人好易就習慣加價依樣嘢：衣食住行乜都加，你包煙加價佢地一早慣咗。有人話應該一加就加到過百蚊咁就冇人買，唔好傻啦，樓價由幾千升到萬幾二萬蚊呎都咁多人搶住入市，你一包煙貴一倍先講緊114，食開煙嘅咪又係一邊屌一邊繼續買，定係你真係覺得窮到用多幾十蚊就會冇錢開飯嘅人仲會洗錢買煙？何況一關之隔嘅羅湖免稅煙咁方便，我好肯定每日都有人一條一條煙咁帶返香港慢慢食，加埋私煙依個市場，你加到咁上下啲人咪轉去幫襯囉。犯法？係啊，但買嗰個實會諗「你捉得哂咩」，而依個又係事實喎。
篇報導仲話香港煙價太耐冇大幅加過，搞到而家買煙嘅相對價格其實比1991年嗰陣仲平。係嘅，全球最貴嘅澳洲煙價去到三十支賣到二百蚊，仲有唔少歐洲國家煙價都貴過香港。但澳洲最低工資去到過百蚊一個鐘，買一包煙用兩個鐘左右嘅人工，其實同香港而家相差無幾。然後我地睇返亞洲，除咗新加玻之外香港嘅煙就係最貴，就算係日本所謂嘅貴煙都比唔上香港，台灣講緊嘅更加係廿幾三十蚊。冇錯，你問返香港煙民，只要係去亞洲旅行差唔多可以話每個國家嘅煙都抵買過香港。
叫人戒煙係好，話哂吸煙危害健康係事實。但委員會要做嘅應該係話比人知吸煙會有咩後果，戒煙對自己同屋企人有咩好處，等佢地戒煙係因為抗拒食煙依個行為，而唔係以為靠加煙稅等班人覺得貴而唔食就可以解決問題。咁吸毒夠又危險又貴又犯法啦，咪一樣大把人試。當然啦，委員會班人唔一定要識埋經濟學理論，不過佢個建議真係好有「何不食肉糜」嘅感覺囉。
