立即捐款

Momay

我係熱愛足球嘅油漆佬。 網誌

體育

印尼小城市居民人口6萬,有2萬5人去睇波?

印尼小城市居民人口6萬,有2萬5人去睇波?
廣告

廣告

印尼甲乙組完季,但丙組就踢埋今日,雖然主流媒體極少講印丙消息,但都係可以透過某些網上資訊得知一二,有時更有網上電視直播部分比賽,我都認真睇過吓及了解過,講真,我覺得印丙水平同香港乙丙組水平差唔多,部分香港乙丙組球隊實力會比印丙前列勁旅好,只不過最唔同係香港乙丙組賽事係免費入場,但冇乜球迷專登入場睇,而印丙同港乙丙一樣業餘性質,球員平時各有正職,不過部分球隊主場比較熱閙,大部分比賽都要收錢。

好似一隊叫Perse Ende嘅足球隊咁,本身球隊來自東努沙登加拉省弗洛雷斯島南部一個叫Ende嘅城市,呢度人口只有6萬,地方設施比較落後,居民日常娛樂就係睇自己地方嘅足球隊同其他地方嘅足球隊比賽,Perse Ende有一個可以容納6000人嘅球場,就算比賽水平好低同要收錢,居民都搶住撲飛,有一個名叫EL Tari Memorial Cup嘅盃賽喺Ende舉辦,決賽有主隊份,居然湧咗25000人嚟,係差唔多全市一半人口,因為太多人,比賽要延遲30分鐘。

呢啲咁火爆嘅場面,通常都係出於偏遠地方球隊身上,除咗娛樂活動少令球場內非常火爆外,對地方有感情都係原因,好似Ende呢啲小城市一向被印尼政府無視,居民見到球隊成積咁好有機會衝乙當然特別興,因為球隊代表住自己地方嘛,自己都想自己地方爭氣嘛。

廣告