商台圖片
律政司昨晚十一時發新聞稿，確認鄭若驊已檢查所有名下物業，發現在港島南區還有物業未經登記改裝。
律政司呢篇新聞稿嘅目的係咪想引證「若驊很忙」？
一. 星期日夜媽媽先發新聞稿，一定係加班做到好晏好忙啦。
二. 原來仲有咁多僭建盤，咁都真係幾忙下，普通人唔為意真係唔出奇。
但！你係專業人士喎，你係官守成員喎，除咗誠信問題、知法犯法嘅嫌疑外，咁「大頭蝦」、做嘢咁甩碌，你做律政司司長點俾到市民信心呢？
俾個例子，問鄭若驊：有消息指政府會根據基本法和釋法內容DQ姚松炎，作為律政司司長你嘅觀點係？
我希望鄭若驊唔會答：各位都知我忙緊自己單僭建嘢，好忙呀，好多僭建，無時間理補選事件，交俾選舉主任郭偉勳全權負責啦！
假設咁答的話追問：但DQ同埋釋法事件係你上手袁國強搞出嚟嫁喎，絕對係律政司司長責任，司長你宜家掛住忙私人嘢，唔回應公務的話算唔算係公私輕重不分呢？算唔算係失職呢？若果係，點可以令市民對你重拾信心？若果真係要搞私人嘢無時間搞公務，係咪應該停職呢？市民交稅出糧俾你，唔係預你搞私人事務嫁喎，你咁算唔算浪費公帑呢司長？
我希望鄭若驊唔會答：Too simple, sometimes naive, always busy! Goodbye!
市民： Goodbye 鄭司長！
係嫁，市民有時好simple，好naive，問嘅問題就係呢啲質素。香港市民只係想搵個信得過嘅代議士，只係想有個信得過、真心為香港好、聽民意、為市民服務嘅香港政府，但係咁簡單合理嘅願望，係香港竟然係貴過獨立屋嘅奢侈品。