新年，講吓啲同錢嘅嘢應下節先。
兩支打入印尼總統盃總決賽嘅球隊佩斯查同峇里聯聽日會喺雅加達GBK 運動場爭冠，雖然兩隊因為要兼顧呢場決賽殘陣出擊亞協盃分組賽結果輸得好樣衰畀球迷閙做印尼足球之恥，但係始終總統盃有一定吸引力，加上GBK 所在地雅加達就係佩斯查地頭，預計GBK 會座無虛席。
不過尋晚賽會公布只會賣66713張飛，賣少一萬張原因係希望球迷睇得舒適，但實情係方便控制人群，而啲飛賣到非常貴，最貴要300000盧比一張，加埋行政費呢嘢嗰樣即係對返差唔多180蚊港紙，對於當地基層球迷嚟講，簡直係超級天價，就算最平都要75000，所以又有球迷喺網上屌食水深，賽會解釋因為GBK 裝修完所以加價，呢個時候就有人拎早排喺GBK 踢嘅友賽巴楊卡拉對FC東京出嚟比較，嗰場波收500，即係港紙一蚊都唔使。
話就話性質唔同，但差距真係好大，不過就算係300000定500000，想睇嘅咪又係邊閙邊畀錢，唔夠錢自己諗計借又好笠又好，到時比賽照樣爆棚，始終今次代表雅加達嘅佩斯查少有地打入決賽，對上一次打入決賽係幾十年前嘅事，嗰陣聯賽最後階段玩淘汰制，有8萬5千人入場。