政府剛剛嘅財政年度再次錄得巨額盈餘。波叔表示為了要與市民分享經濟成果，決定延續以往政府的「理財哲學」，寬減下一個財政年度合共四季的差餉，變相間接向廣大市民派糖。寬免措施似乎人人有獎，永不落空，但其實邊種人可以同政府分享最多「經濟成果」呢？
寬免差餉作為政府其中一種「全民派糖」的安排，其實已經成為過往至少十年政府「理財哲學」的基本盤。據差餉物業估價署資料顯示，政府從2008－2018年十個財政年度都有寬免差餉，而每年市民劃一享有嘅差餉寬免上限由3000到10000元不等。
若我們回顧最新及過往4年的財政預算案資料，我地馬上可以發現多年來公屋租戶同埋小業主，其實只係享受到小量差餉寬免金額；相反，大業主就差不多年年用盡政府既差餉寬免。波叔係最新既財政年度裡面，調高差餉寬免上限至上年既兩倍有多，寬免了中型及大型住宅單位業主接近10000元既差餉。呢班中型大型業主不但好似往年咁繼續用盡差餉寬免百分比，寬免金額更比以往幾個財政年度所免既差餉多至少一倍以上。相反，公屋租戶同小型業主今年享用到既差餉寬免百分比卻明顯比以往兩年少近三成多至一半。
從房屋政策角度而言，政府多年來以劃一差餉寬免上限的稅務優惠向市民「派糖」，其實是嚴重傾斜業主利益。而當業主手持既房屋規模越大同擁有越多物業，從政府所享得既福利優惠就越大。這無疑是一種「大業主福利主義」，而呢個「越有錢越有得玩」嘅現象係最新嘅財政年度將會更加明顯。這豈不等同鼓勵市民炒樓收租咩？
今次政府話要同普羅市民「有福同當」，邊個最有資格同政府分享香港「經濟成果」，成為最大嬴家，大家一目了然啦。