看過不少評論後，發覺囤地波最大的問題，就是欠缺一套理財新哲學。所以，只能用舊方法派下糖，搞下基建，佯稱投資為未來。
正由於有錢唔知點駛，最需要扶助的人（唔止基層）固然得不到應有的支援，錢用不得其所，派糖派得太多畀中產（明報講法是十粒有八粒），更可悲的是，囤地波連搵一個似樣啲嘅理由畀自己去說服公眾都無，咁反智又可以點樣叫人對未來有希望呢？
就好似租管咁，佢在記者會上話，租管未必對社會最好，所以決定不推行。喂，阿哥，呢個推論完全不成立啊!你都只係話未必啫，未必即可能得，可能唔得，咁最多咪推出要再作硏究（租管可以針對性施行，不是一刀切），點可能得出否定的結論呢?唯一解釋係，你一早已經有晒結論，無意保障市民最起碼的居住權，令既得利益者受損，就講啲似是而非的說話但求蒙混過關。
當然，優良的管治，不能單靠一套理財哲學，還需要更宏觀的社會願景和未來發展的藍圖相配合，這亦少不得具知識含金量的實證研究打底，以勾勒出可行的路線圖。在此基礎上，尋求公眾共識，再按部就班，逐年將資源按有共識的方案投放落去，循序漸進，累積成效，這樣管治的效益和正當性才有保證。
這種對社會發展的想象，其實很根本，以前大學學生會寫政綱時都曉得，但特區政府的高官完全無這個概念。最可笑的是，囤地波話自己有一套理財新哲學，查實佢連「哲學」和口號都分不清楚，居然好意思扮醒，真係吹脹啊！