12/3 灣仔會議展覽中心
民主派慘敗，補選兩席不保
＊ ＊ ＊
圖 1 區諾軒
儘管區諾軒獲勝，但他幾乎毫無笑容。
區的太太與父母，都一直在點票中心守護在側，守候結果。
區母說他的政治啟蒙來六四。父母帶時值中五的兒子參與燭光晚會，直至晚會完結，他依然不願離去，從此與政治結緣。「佢本來冇諗住選，臨危受命嘅啫。」
另一邊廂，工聯會王國興到公眾區省視，笑容掛面，對成績甚為滿意，向身邊的同伴說：「好威架喇，有交待。」
＊ ＊ ＊
圖 2 馬嶽
問：可唔可以形容民主派大敗？
馬嶽：我會講挫敗。差距縮窄好多，區諾軒得票率僅僅過半，只係贏對手 3%。當雙方都唔係明星，單對單民主派已經冇優勢。
對我地嚟講 DQ 應該好㷫，但似乎唔係，單打 DQ 議題，動員唔到大量選民。對方搶奪中間選民嘅能力更強，資源更多。
＊ ＊ ＊
問：好少人諗過九西會輸。上屆選舉民主派得票超過 12 萬。民主派嘅人選同策略有冇失誤？
馬嶽：計埋游蕙禎、黃毓民超過 16 萬。
仲可以派咩人呢？我唔覺得馮檢基，袁海文會贏。除非派政治明星，但嗰個世代已經退哂。
冇人可以攞到成個光譜嘅飛。我分析係姚攞到年輕票、本土票，但攞唔到中間票、基層票。高估左佢知名度，基層選民唔太識佢。
亦唔可以賴其他政黨，民主派嘅實力本來就係咁多。就算唔計啟晴、德朗，好多區都輸幾十票、一百票左右，除左美孚之類，輸嘅區比贏嘅多。
＊ ＊ ＊
問：上一次新東補選，楊岳橋得票 16 萬；今次補選范國威得票 18 萬。若干本土派嘅焦土呼籲，對現實有冇影響？
馬嶽：係有，不過梁天琦六萬幾票唔會全部消失。
鄧家彪只係攞番周浩鼎嘅票，到此為止。而方國珊又攞到中間選票，兩邊選票都食左，抵消左不穩定因素。
但范國威嘅得票率只有 45%，係三區民主派中得票率最低。上次補選非建制（民主派 + 本土派）得票率有 52%，而家流失左好多票。
＊ ＊ ＊
問：民主派表現非常之差，下次補選要點改變？
馬嶽：首先仲未知劉小麗、梁國雄可唔可以選。民主派要有更好嘅協調，唔好以為單打 DQ 可以贏。
人選困擾左民主派一段日子，推遲左競選工程。對方食髓知味，下次一定再用依招。