印尼今年有好多球員外流，但大部分都係去大馬同泰國呢啲印尼鄰居嗰度，只有少量能夠喺歐洲揾班落，其中一位係被媒體瘋狂吹噓為印尼新美欺嘅Egy Maulana，呢位中前場球員身高只有165cm，不過佢嘅速度，突破能力以及射術都非常出色，喺上年代表印尼去法國踢土倫盃，結果搶眼嘅表現惹嚟歐洲同亞洲職業球隊注意，有多支球隊向佢發出試腳邀請，佢最後佢選擇同波蘭甲組球隊Lechia Gdańsk簽約，成為首位喺波蘭立足嘅印尼球員，只要夠18歲就可以上陣。
究竟佢有幾巴閉，今年亞運可以睇到嘅，以往都有印尼球員去到歐洲落班，不過冇幾多係有成積畀人睇到，喺90年代印尼出咗一個有好天份嘅前鋒球員叫Kurniawan Dwi Yulianto，佢人生第一支效力嘅職業球隊唔係任何一支印尼球隊，而係意甲嘅森多利亞，之後轉會去瑞士嘅盧塞恩，曾經有唔錯嘅表現，但因為沉迷吸毒，畀瑞士政府趕返印尼。
去到2000年，當時18歲嘅印尼前鋒Bambang Pamungkas畀荷蘭丙組球隊Norad睇中，最後簽約加盟，成為進軍荷蘭嘅印尼第一人，雖然表現係幾好，但佢唔習慣荷蘭天氣，唔夠半年走咗。
之後陸續有印尼球員喺歐洲踢波，西班牙有，比利時有，葡萄牙有，希臘聯賽都有，而有啲因為血統歸化印尼嘅荷蘭球員，喺荷蘭踢波就被歸類為外流，不過最叻嗰個只係荷乙正選，唔知呢個畀咁多人吹噓嘅印尼新美欺會唔會愈踢愈高層次呢？