革命….並唔係一次成功就可以堅持到永遠……
2017年對於所有長安邨居民黎講，係一個轉捩點，因為2016年底有一班人自組義工團隊（長安後浪）同法團週旋，大概都係民生問題， 當初嘅我，只會覺得成條邨咁多人， 你地長安後浪可以做到咩大事丫，日子慢慢過，佢地號召力越黎越大…最後佢地成功推翻舊人。
金錢…..應該係一個導火線，正正因為佢地發現好多不明大金額支出，而叫醒熟睡中嘅人….
一年又過， 黎緊4月8日係換屆業主大會， 開初我單純得以為舊人會放棄， 最多都係心有不甘，想報復而走去參選，直至3月27日公佈參選人名單，竟然見到一個既熟悉但又好陌生嘅人去參選，依個人係長安邨2期區議員譚惠珍，點解我會話佢係既熟悉但又好陌生呢？！因為我住2期30年，我一直覺得依個區議員係形同虛設， 唯一可以見到佢就係盆菜宴同生果檔，一直流傳譚惠珍同舊主席李錦麟關係好到不得了，而今次譚惠珍帶同舊法團委員一齊報名參選 。
當2017年舊法團下台後，有多街坊都親自發掘邨內問題，最終比我係港深管理時代輕易搵到譚惠珍同舊人掛勾嘅資料。
2001年長安邨業主立案團成立，同樣係區議員嘅譚惠珍竟然可以免費佔用一個270呎嘅倉， 眾所周知， 長安邨內倉庫都以付款形式租予要裝修居民及邨內承辦商，（如平均呎價$10/呎， 16年來長安居民白白沒了$518,400）究竟點解譚惠珍會有此特權？ 變相地同舊人虧空公款？