經過傘運之顛，學運起伏跌宕，青黃不接，數校斷莊，港大亦一度在列。縱星光幾稀，仍有學生繼承，但不同學校的結局迥若天地。來日學運能否振乏興微？
＊ ＊ ＊
問：港大一度傳出斷莊，但你地趕及喺補選參選。係咪不忍斷莊，所以臨時組閣？
黃程鋒（左，星衍候選會長）：本來星衍一早打算參與周年大選，但無奈莊友屋企出現問題，所以退出。
後來知道有斷莊嘅危機，我地再聚埋一齊，發覺莊友嘅問題已經解決，就把握補選嘅最後機會參選。
＊ ＊ ＊
問：點解想參選？
黃程鋒：去年我係評議會成員，學識左好多，想進一步學以致用。其他莊友都有憧憬，想為學生會盡一分力。
＊ ＊ ＊
問：你地點睇六四？
彭家浩（右，星衍候選外務副會長）：雨傘革命之後，本土身份意識抬頭，尤其係年輕人，係咪再用中國人嘅身份悼念？
近年學界同港大都唔去支聯會集會，自行悼念，舉辦論壇。身份認同出現轉變，認為自己係香港人，唔係中國人，未必可以繼續當年「我地都係中國嘅同胞」悼念。我地要畀其他平台，以第二種身份認同討論六四。
但中共屠殺學生，係鐵一般嘅事實。基於人道立場，悼念仍然需要。
＊ ＊ ＊
問：所以你地唔會去維園晚會？
彭家浩：暫時唔會再參與。一來我地未必認同以中國人嘅身份悼念；二來我地未必認同其綱領「建設民主中國」。我地唔否定依啲綱領，但作為集會主題，我地覺得未必恰當。
假如支聯會調整綱領，或者畀學界有足夠嘅發聲機會，我地可能會考慮。但暫時預計就未必會。
我地會重漆太古橋，洗刷國殤之柱，依啲係港大嘅歷史，要承傳落去，悼念六四死難者。
至於論壇我地未有打算搞。當日有需要悼念，但過去幾年學界同港大都搞過論壇，圍繞身份認同轉變，以香港人身份睇六四，三年嚟已經差唔多，討論已經足夠。幾時都可以討論，未必為搞而搞。
如果有幸當選，我地會問評議會轄下嘅時事委員會，想唔想搞活動；或者同學界合作，但暫時未有明確答案。
＊ ＊ ＊
問：你地點睇中港關係同香港前途？
黃程鋒：現階段我地唔主張香港獨立，但我地認為有討論嘅需要。
因為獨立訴求背後有好多原因。有啲人覺得香港係一個種族；有啲人覺得香港喺中國打壓下，無法再保障核心價值，所以要搵新出路。但獨立之後，能否保障香港嘅核心價值？仍然未有清晰答案。依個就係需要討論嘅地方。
彭家浩：嘅然有咁多不確定，需要有討論嘅空間。一國兩制已經失效，中國唔遵守承諾，要尋求其他出路。為左香港嘅核心價值，市民要有機會討論。
話討論港獨犯法好唔合理。可以好和平地討論，而冇暴力嘅標籤。
＊ ＊ ＊
問：有冇心理準備要抗爭甚至被捕？
黃程鋒：我地全莊都有被捕嘅心理準備。社會氛圍咁大打壓，好難避免。
由於我地內閣比較少人，會以學生會運作為先，外務主要由我同彭家浩擔當。
＊ ＊ ＊
問：傘運前但凡社會運動，都會見到學聯同各學生會嘅身影，但近年真係少左很多。你們有什麼意見？
黃程鋒：而家大學生對社會事務仍然關心。可能因為希望投身外務嘅同學比較少；而且有啲議題好搶眼光，例如政制同法律爭議，其他事件比較難兼顧。
但投放嘅心力係咪少左？我有保留。
彭家浩：學生仍然參與，不過著眼喺政制、法治、人權。近年社會打壓大左，事件好頻密，能夠參與到嘅議題可能較少，但仍然有深度，我地旗幟鮮明反對政治打壓。
本土思潮亦係原因之一。近年學生會本土化，未必認同泛民政黨嘅理念，儘量唔想同佢地扯上關係。
但我地唔會咁諗。我地有自己理念，向港大學生負責；但只要認同議題嘅理念，就一定義無反顧去做。
＊ ＊ ＊
問：最近當選嘅理大學生會「理凝」有意重返學聯，你地有咩計劃？
黃程鋒：我地暫時冇計劃加入學聯。
一來就議題合作嘅模式仲發展緊，而且有潛力發展，點解唔擺多啲心力先發展依個模式？
二來學聯啱啱經歷改革。我去過會議，對改革嘅內容有保留。
最具爭議就係學界溝通平台依個政策，除左院校學生會，其他學生組織、民間組織都可以加入平台。究竟點定義學生組織？其他學生會有冇權參與決定？
而且溝通平台嘅決定，對常委會嘅決定有冇影響？所以我地唔係咁同意將學生組織、民間組織併入溝通平台。
我地想用幾年時間，睇吓改革嘅成果，再考慮會唔會重返學聯。
彭家浩：學聯都係學界一部分，我地唔抗拒同學聯合作。只要有合適議題，需要學界團結，我地一定保持接觸合作。
＊ ＊ ＊
問：如果當選，你地有咩特色同期望？
黃程鋒：星衍最希望屬會同會員有更強嘅意識，學生會不止中央幹事會同評議會，係由每一個屬會、每一個會員組成。
我地會為屬會提供更多協助，每一個屬會都能各司其職，一齊努力，先能發揮學生會嘅角色。
至於外務，我地希望同學能建構對香港未來嘅想像，唔止政制，仲兼顧文化、產業等議題。外務除左喺校外活動，我地亦想加強校內網絡。全體同學參與，先能壯大學生會嘅力量。