五月底喺倫敦開皮ConIFA World Football Cup（WFC），呢個世界盃同另一個世界盃最唔同嘅，就係WFC以業餘球員為主，現役仲踢緊職業嘅球員比較少，除咗效力港超理文嘅孫民哲代表''在日朝鮮人聯合足球隊''外，A組入面都有三位現役職業球員，一位代表Cascadia（卡斯卡迪亞），兩位代表Barawa（巴拉韋），代表卡斯卡迪亞嘅係前鋒Calum Ferguson，Calum Ferguson今年23歲，雖然喺蘇格蘭出世，但以往代表嘅係加拿大U20，曾經喺蘇超嘅恩華尼斯踢過三季，但期間只係上陣過兩次，近年轉戰蘇格蘭低組別聯賽，今季效力乙組嘅艾珍城，但係一直爭取唔到正選位置。
而巴拉韋入面兩位現役職業球員，有一位叫Kingsley Eshun，現時效力昆士柏流浪，今年畀球隊借去聖奧爾本斯城，另一位係效力英乙卡維尼嘅中場Aryan Tajbakhsh，不過唔知佢同巴拉韋有咩關係，佢係伊朗及土耳其混血。
B組方面大熱門及上屆冠軍阿布哈茲係有六位現役職業球員，佢哋全部都喺俄羅斯踢波，呢六個入面最出名係後防球員Anri Khagush，呢位2016年已經代表阿布哈茲踢WFC嘅球員曾經係白俄班霸巴迪嘅主力，現時喺兵工廠有一定上陣機會，不過唔係必然正選。
另一支北塞浦路斯就聲稱全隊都係現役職業球員，佢哋有一個職業足球聯賽，大多數球員都係喺北塞嘅球隊效力，只有前鋒Ahmet Sivri喺加拉塔沙雷踢緊梯隊，而大軍名單內出現曾經喺澳洲、印度、新加坡、大馬聯賽立足嘅前愛爾蘭小國腳Billy Mehmet，呢位球員，有留意東南亞波嘅波友可能對呢位光頭佬有印象。
其他嘅仲有代表塞凱伊嘅前匈牙利國腳Csaba Csizmadia及前巴索夫主力Attila Hadnagy，代表旁遮普嘅前巴基斯坦國腳Yousuf Butt，代表西亞美尼亞嘅前亞美尼亞國腳Gevorg Kasparov，仲有同為代表西亞美尼亞，喺亞美尼亞出世嘅哈薩克小國腳Gevorg Najaryan。
其實喺代表資格上，每個參賽隊伍都唔同，有啲只要你係有相關血統就有資格代表佢哋，有啲只要你認同佢哋政治傾向兼喺當地土生就有資格代表佢哋，好似卡斯卡迪亞咁肯搵嘅有大把美國職業球員，但避免遭受各種麻煩，好多現役職業球員未必肯踢。