上次篇文講咗2010同2012年兩屆大賽，德國都係用4231。其實唔止，去到2014同2016都係的．睇陣容前，先再講多次結論：
1）其實真係唔使討論咩3後防定4後防。正式賽事德國差不多冇用過3後防，而球員在球會亦極少踢3後防。即使唔夠人用路維都唔興用3後防。討論完畢。（對，其實洲際盃2017用過3中堅，拎冠軍添，但只係B隊，參考價值不大）
2）亦都其實唔使點討論咩陣式。路維就係死硬嘅4231，沒有其他。你可以將佢當係451或433，不在呢啲細節糾纏。重點係：德國只打單箭頭，德國唔會出3中堅。討論完畢
3）梅拿唔會打中鋒，梅拿唔會打中鋒，梅拿根本唔會打中鋒。好重要要講三次，討論完畢
4）路維其實幾鍾意用奧斯爾打邊路，效果亦唔錯。唔好低估呢樣嘢再出現嘅可能。
5）路維好鍾意用中堅打閘。有時係因為冇人，但佢真係有呢舖瘾
去片，睇晒咁多場波。
分組賽：德國4-0葡萄牙 入球者：梅拿X3，葛斯
2012之後，又再換咗少少嘢，唔要4231住。變咗個類似4321或451嘅陣式。侯姆斯同路維一度不和，但依然係後防主力。原本拍檔嘅巴斯杜巴成日傷，已經冇入選。另一中堅變返最老經驗嘅梅迪薩卡。保定又係畀人推去踢閘，右閘。拿姆呢？左閘都唔踢，變咗6號防中，如果冇記錯當時哥迪奧拿在拜仁都係屈咗佢踢呢個位。左閘就又係原本踢中堅嘅賀維迪斯，佢仲要係唯一一個踢晒咁多分鐘嘅。中場方面，小豬先列後備，換咗年青但已上位嘅卻奧斯擔正。左邊呢？普度斯基都開始老，用咗大勇嘅超新星葛斯，葛斯都有份踢2012，但只係後備玩過一陣。中鋒？冇中鋒，變咗奧斯爾。完全唔知點。但可能就係咁，對手完全唔識防。右邊位嘅梅拿居然連中三元。當然葡萄牙打少件都有影響—但當時佢地已經落後兩球
分組賽：德國2:2加納 入球者：葛斯，高路斯
陣容大致上冇變，但奧斯爾打右邊路，梅拿打返正前咁—果然係唔掂的。再講一次，梅拿不能打正前鋒，梅拿不能打正前鋒，梅拿不能打正前鋒。德國向來都有第二場毛病，06補時先入波，08輸波，10又輸，12年冇事，14又係失分。呢場波係進退失據嘅，最後要換入高路斯先追和。路維係見到問題的
分組賽 德國1:0美國 入球者:梅拿
繼續唔信邪，繼續要梅拿打中鋒，結果都係唔係好掂的。呢場奧斯爾繼續打右邊路，左邊路畀返普度斯基。中場唔用基迪拉，用卻奧斯。效果，依然係麻麻。但無礙小勝首名出線。
16強: 德國2:阿爾及利亞1 入球者:舒爾利，奧斯爾
呢場波就經典咯，事後睇好似好簡單，當時睇刺激到爆。阿爾及利亞差不多係壓住德國嚟砌，唯獨紐亞神勇成日殺上中場清波。繼續拿姆打中場，拍卻奧斯小豬。前面葛斯奧斯爾，梅拿打正中鋒。咪出事咯。
8強 德國1:法國0 入球者:侯姆斯
呢場幾重要，因為路維好似卒之搵到佢嘅最強陣容。卒之都係返返去4231。出返高路斯擔正，梅拿左奧斯爾右（都話路維好鍾意奧斯爾打邊），中間基迪拉小豬卻奧斯。拿姆打返閘。中間保定拍侯姆斯。呢場係踢得不錯的。亦都帶住呢個陣容入到4強
4強 德國7:巴西1 入球者：梅拿，高路斯，卻奧斯X2，基迪拉，舒爾利X2
原先預計好凶險結果好輕鬆，亦載入史冊。留意，都係同法國同一個陣容。
決賽 德國1—阿根廷0 入球者：葛斯
雖則係打到加時，但德國其實稍佔上風，亦都冇乜真係受考驗（除咗一球越位波，同埋希古恩一球單刀失機）。基迪拉傷咗，但依然都係呢個陣。後來卡拉馬都傷埋變咗舒爾利入替就後話。應該舒爾利移咗去左邊，奧斯爾變返中間啲。
想講嘅係，路維一生人最大成就就係呢屆世界盃，帶佢過關嘅就係4231，梅拿打右邊，侯姆斯拍保定打中堅，中堅打閘。真係唔好低估佢對啲啲嘢嘅迷信。2014後，小豬，拿姆，普度斯基，賀維迪斯，梅迪薩卡，同埋高路斯都淡出國家隊
2016年，閘位其實開始有啲新球員。左閘嘅赫達極速上位，而右閘甘美治亦都在呢個大賽極速奠定拿姆接班人嘅地位。仲有達斯拿亦都叫做確立係主力—雖然暫時都未係去到好核心嘅位置。利萊辛尼都有份去，但冇乜出。
分組賽 德國2:烏克蘭0 入球者:梅斯達菲，小豬
拿，都係返返去4231。左閘赫達冒起，並成為路維愛將，去到而家都係。右邊依然係搵賀維迪斯中堅打閘。中路侯姆斯冇傷病，但讓位畀梅斯達菲。奧斯爾返返佢最擅長嘅中路，梅拿繼續右邊，左路用咗新晉嘅迪斯拿。高路斯走人後嘅中鋒位，暫時由葛斯頂替，效果麻麻。但當然對烏克蘭唔係問題
分組賽 德國0:波蘭0
同對烏克蘭差不多，但侯姆斯拎返正選。講完
分組賽 德國1:北愛爾蘭0 入球:高美斯
唔再用賀維迪斯打閘，用甘美治，效果不錯。另外呢場冇用到達斯拿。葛斯打返後一格，換高美斯打正中鋒，效果還可以，但葛斯依然冇乜料到。
16強 德國3:斯洛伐克0 入球：保定，高美斯，達斯拿
呢場16強係德國成屆打得較好嘅一場，唔好忘記呢場波前冇耐友賽德國先輸畀斯洛伐克1:3。照舊變返4231。葛斯被棄用，路維卒之忍夠。高美斯打中鋒位，迪斯拿返去左路，兩個都有波入。輕輕鬆鬆三比零。高美斯在中鋒位撞開其他人或用頭做二傳效果幾好，今屆佢亦算打得比較好。
8強 德國1:意大利1，入球者奧斯爾。十二碼德國晉級
呢場就真係變陣，針對實而不華，當屆越踼越有嘅意大利（贏比利時，瑞典同西班牙都好經典）。講過啦，2008 2010比西班牙食住，2012又輸比意大利，2014兩隊都避到就拎冠軍，呢屆又嚟意大利。結果都咬得幾緊。高美斯明顯速度大不如前，但居然都去到邊路攞波簡接造就奧斯爾先開紀錄。然後保定一個幾無謂嘅手球就失波。去到12碼，大家都話德國係專家，但其實都有三個人射失（正係名氣最大嘅梅拿，小豬同奧斯爾）。新仔嘅甘美治赫達反而射入，赫達仲係射入晉級一球。留意個陣變得幾緊要，打雙箭頭，唔用達斯拿，奧斯爾推去左邊，而甘美治推上中場，賀維迪斯就頂佢個右閘位，唔知想點。但你見路維真係唔怕用中堅打閘的，對意大利阿根廷都敢。
4強 德國0:法國2
呢場就真係未曾高潮已經收皮，感覺好似都未盡晒力咁，亦唔覺得真係冇得打。路維又唔用意大利陣式，回歸4231。又再用梅拿打正中（結果失敗），奧斯爾打右邊（都話佢好鍾意），達斯拿左邊。中路唔用基迪拉（傷？）用安利簡。後防用返賀維迪斯打中堅，因為侯姆斯停賽。德國又係失球大意十二碼，冇計。
睇晒四屆，以下結論：
1）其實真係唔使討論咩3後防定4後防。正式賽事德國差不多冇用過3後防，而球員在球會亦極少踢3後防。即使唔夠人用路維都唔興用3後防（對，其實洲際盃2017用過3中堅，拎冠軍添，但只係B隊，參考價值不大）。今屆亦都會係4後防。除非遇到好強橫嘅對手（巴西／西班牙）而路維想好大膽咁出奇制勝—但佢從來唔係咁嘅人。
2）亦都其實唔使點討論咩陣式。路維就係死硬嘅4231，沒有其他。你可以將佢當係451或433，不在呢啲細節糾纏。重點係：德國只打單箭頭，德國唔會出3中堅。
3）路維好鍾意用中堅打閘。有時係因為冇人，但佢真係有呢舖瘾。今屆路維帶咗8個後防 -已經比2016年多 — 2016年佢只係帶7個。2014年佢帶咗9個，有啲係根本冇用到嘅。理論上而家甘美治赫達一左一右係路維心水，但就算有咩傷停，我估佢叫保定去打閘（然後魯迪加打中間）嘅機會大過出柏汀夏謹之類。
4）梅拿唔會打中鋒，梅拿唔會打中鋒，梅拿根本唔會打中鋒。好重要要講三次，討論完畢
5）添姆雲拿係德國過去兩年最大發現，自2014年後一路困擾德國嘅高路斯接班人問題解決咗，佢就係答案。佢只爭一個大賽證明自己。但9號位非佢莫屬，高美斯只會係後備。梅拿亦只會打右邊
6）路維其實幾鍾意用奧斯爾打邊路，效果亦唔錯。當然今屆有達斯拿有萊斯，呢個可能性就細啲。但如果梅拿傷咗呢？右邊可能你會見到奧斯爾
除咗奧斯爾傷咗外，呢個就係德國最強陣容
7）踼到一鑊泡係一回事，但早兩日對沙地阿拉伯場友賽，除咗奧斯爾受傷外，就係德國想排嘅最強陣容。安利簡落選，小豬拿姆收山，德國好似冇左個6號位球員咁。以前應該係基迪拉，但唔知佢係老定不安於份，冇乜做好防守本份，卻奧斯更加唔係咁嘅球員，雖則有必要時佢可以打後少少然後由中堅幫佢。我懷疑奧斯爾缺陣有影響：唔係奧斯爾識防守，而係萊斯達斯拿梅拿都係鍾意推波好進取嘅球員，推甩波時其他球員未回得切。相比之下奧斯爾其實鍾意睇定啲先—變咗佢其實佢拖慢咗比賽。
無論如何，呢個就近乎係最後陣容，紐亞擔正無誤，狀態令人仲有少少擔心，有朋友話覺得佢唔多敢用腳大腳清，但我理解佢其實唔鍾意大腳清。中路保定侯姆斯狀態明顯唔係最佳，保定仲傷好冇耐，但亦冇計。左右閘赫達甘美治必然正選了。正中鋒添姆雲拿係今屆希望，食粥食飯睇佢，梅拿打右亦冇得郁。可以諗嘅就係剩低嗰幾個。卻奧斯點睇都係必然正選，所以剩低就係萊斯奧斯爾基迪拉迪斯拿四選三，其實四個都唔會點助守，但我會選擇唔要基迪拉—原因好簡單：年紀。比我會揀中路出卻奧斯同萊斯奧斯爾，等卻奧斯企後啲。右邊梅拿，左邊達斯拿。
但在奧斯爾好返前，你應該都見到沙地阿拉伯個陣，最多達斯拿同萊斯掉位。