當我哋望到國際排名喺6年前只係131位嘅冰島，到今日可以喺世界舞台發光發亮，力戰阿根廷都不敗離場，就算唔係冰島人，都會覺得呢隊冰島好拿癲。賽後好多人先知，原來冰島全國只有不足33萬人，人口仲少過區區一個深水埗；人哋當中有球員另一身份係導演、牙醫、甚至係工人，要同腦細請假嚟踢世界盃。
「點解人口同深水埗咁上下嘅國家，都可以踢出咁出色嘅足球？」
「點解人哋幾年前都仲係魚腩，而家就勁到打強隊都不敗？」
「點解冰島咁細個地方都做得到，但700萬人嘅香港唔得？」
講真係好難唔葡萄，但又有冇退一步諗過，人哋付出幾多努力，而我哋又有幾多？
先講下冰島政府做過乜。
環境方面，冰島知道好難喺寸草不生嘅室外發展足球，18年前起咗第一座室內足球場，時至今日冰島國內已經有13座室內運動場、過百座小型「全天候運動場」以及擁有地熱暖氣系統嘅室外足球場。
人才方面，根據2016年統計，冰島有180位擁有有歐足聯A級教練牌、600位擁有B級教練執照，500人當中就有一位足球教練，比率高過英格蘭、法國等足球傳統強國。
有人材、有資源、政府亦相當配合，但最重要都係社會氛圍。當地人民相當重視體育，父母從來唔介意子女以運動員為職業，甚至唔介意女仔走去踢波，因為佢哋認為，係可以透過足球培育出團結同紀律性。
反觀香港呢？
一句講曬：做運動員搵唔到食呀。
就算唔講先天上地理環境同埋身體質素，政府嘅投入都不能相提並論。冰島政府有心發展，先投資，後講成績，但香港係調番轉，先講成績，後畀資源（仲要有可能有成績都唔會畀資源），根本係本末倒置，當中最大原因只有一個：要錢，不了。
OK，香港政府都係乜都冇做嘅，但搞嗰個鳳凰計劃有幾成功？有目共睹。咁不如試下效仿冰島做法？早前政府派人去冰島取經，睇下可以點樣將冰島嗰套融入香港，但冰島青年軍教練視察香港環境後表示，場地、訓練場定係球員心態，都同冰島標準相距甚遠，難以套用。
做又鬧，唔做又鬧，但撫心自問，有冇擺個心出做好呢件事？
人哋成功，唔可以單單好片面用「因為人哋係歐洲人」解釋，因為上至政府，下至父母，從來冇將體育視之為重要項目，冇資源再加冇心搞，點樣成功？嘥氣啦！而當你以為冰島成功原因，只在於資源上嘅投入，其實係忽略咗佢核心元素－團結。
兩年前歐國盃，有接近3萬位冰島球迷飛去法國支持冰島，就連冰島總統都係座上客之一，佢甚至係唔坐VIP包廂，選擇同球迷一齊喺球迷區打氣，當時佢好霸氣咁講：「呢刻我唔係總統，而係普通一位冰島球迷。」當時，有冰島航空公司特別安排直飛法國行班、就算冇去到現場嘅人都喺國內支持球隊，歐國盃期間，電視轉播率為99.8%，幾乎全國上下同一時間都做緊同一件事－支持冰島。
贏波，佢哋一齊慶祝；輸波，都一齊面對，呢種甘苦共渡嘅第十二人，全國冰島嘅人都係。我哋羨慕冰島成隊波咁團結，首先自問可唔可以做到呢點？而當我哋鬧政府只低限度配合，我哋又有冇做好撐球隊嘅本份，入場支持港隊呢？
點解冰島咁特別呀？ 因為佢哋成個國家嘅人，都做到上下一心，團結去做好一件事，呢種力量先係最強呀。
當哋可以羨慕，但唔好同人比較，唔係人比人比死人，而係人哋真心值得有呢個回報，我哋？Sorry，除咗人口多之外，真係冇一樣嘢比得上...