本文寫於衞冕冠軍德國揭幕戰爆大冷不敵墨西哥之前，睇賠率各樣都係今屆最大冷門。然後大家會重提世界盃嘅「衞冕魔咒」。
講明先，原創的。我幾肯定有其他人寫過，好可能比我好。但我今次唔想譯外文，想自己寫下。下面啲data我有original keep住，歡迎挑戰或再加工，聯絡我我發畀你。但你可以預計實會有啲錯（唔撚使做咩）。
「丁蟹效應」比較難驗證，當然都有人正經咁去測試下。「衞冕魔咒」又係咩回事？其實存唔存在？係咪自我實現預言？如果存在，點解會有呢樣嘢？
首先，「衞冕魔咒」可以兩種解讀（其實係同一回事）。第一係，自1962年巴西成功衞冕之後，已經冇一個國家可以衞冕。今屆德國暫時未死，但望落好似都唔似會成功衞冕。二來，衞冕國家，唔少都死得好慘。94我初睇世界盃 ，衞冕嘅德國八強出局。98年巴西衞冕打到入決賽，已係近年衞冕冠軍最好成績。02年衞冕嘅法國分組出局，06年衞冕嘅巴西八強，10衞冕嘅意大利同14年衞冕嘅西班牙又係分組賽．今年德國都唔係太樂觀。而02法國同10年意大利，仲要係包尾出局的。
係咪真係有魔咒？似乎係的。因為世界盃冠軍嚟嚟去去嗰幾隊，我成日提嘅10倍賠率法則，近幾屆都係10倍賠率以內嘅國家拎到冠軍，每屆有機會拎冠軍嘅其實係三五隊，似乎唔似歐聯咁激烈 — 而畢竟歐聯都有隊成功衞冕。
衞冕冠軍搞到八強甚至分組出局正唔正常？梗係唔正常啦，因為應該係頂級球隊嘛，四年就變成弱隊？其實可能係，四年就係關鍵，陣間講多啲。而你其實好少見歐聯冠軍隊首圈出局 — 當然歐聯似乎多隊墊底，而且踢雙循環，弱隊爆冷出線其實難。而02法國同10年意大利，仲要係包尾出局的。
點解衞冕冠軍會出事？其實唔睇波都會直覺有幾樣嘢講到。驕傲啦，輕視對手啦，冇以前咁飢渴啦，都會係原因。另外，槍打出頭鳥啦，你係黑馬時人哋冇咁防備，你係冠軍隊，人人睇你打法，甚至抄你，日夜研究點破解你。對住你都特別醒神（但其實未必解釋得晒，巴西次次都係熱門咁滯，但無礙佢哋拎到佳績，你睇一萬次Michael Jordan打波，明知佢會點入，唔等於你阻得到嘅）。
仲有一樣嘢，係本文重點想講嘅，選人，同埋年紀。亦係見到今屆德國有感而發。之前文章講過，德國2010果屆係大換血嘅。而其實當時冒起嘅奧斯爾，基迪拉，梅拿等等，而家仲係主力（紐亞都係，但守門員襟玩啲），不經不覺就八年。基迪拉同奧斯爾同梅拿，今年亦開始畀人懷疑狀態唔得，已經過咗高峰。
今屆德國對墨西哥一場，正選有七個人係上屆世界盃主力（已經唔計垃圾時間出嚟嘅達斯拿）。可以返返去頭先講嘅問題，戰意體力等等仲有幾多？
而似乎唔止德國係咁，諗都諗到，好合理哋，其實好多衞冕隊都係會靠老鬼嘅。常理推測，往往係會明知老鬼狀態唔多好，但又唔敢放晒畀新人嘛。人性啲嘅講去係，你出晒舊臣，除非個個三張幾，否則出事嘅（例如德國而家咁），球迷傳媒都係鬧球員多。但忽然間亂點鴛鴦唔用名將嘅，首先名將自己實會場外係咁鬧。球迷傳媒亦多數會質疑你，點解唔揀邊個邊個。簡單嚟講就係不求有功但求無過，凱恩斯名句話齋，隨俗而失敗，比起不隨俗而成功，更能獲得認同。If it ain’t broke, don’t fix it。永遠都係衰鑊甘之後先會大刀闊斧改革，德國自己就係好例子。
空口講白話唔夠服力，畀啲數字你。以下我統計左最近5次世界盃，呢堆強隊嘅陣容。每屆平均年紀，留咗幾多舊人等等。荷蘭因為兩次冇份踢世界盃，冇加入去。
少少補充：１）年紀我搵維基百科，當然同你睇其他地方有啲唔同，我冇計到幾多月咁詳細。２）唔好問點解唔搵多幾屆，冇咁多時間，況且1998年前係22人，會影響下數３）計嘅係全隊年紀。所以一定會唔全面。理論上你可以落場嗰堆好年青，但後備好老拉高晒，反之亦然，我就冇興趣慢慢計 ４）同樣地，同樣係甶6件老鬼，可以係四年前係正選而家又係，亦可能四年前係正選而家全部變晒大後備。都係嗰句，你得閒嘅你不妨自己做一個
黃色係當屆冠軍，綠色係衞冕冠軍
好，睇數字。黃色係當屆冠軍，綠色係衞冕冠軍。
先睇02法國，10意大利，14西班牙呢三隊分組出局嘅。法國02年選咗14個舊將，西班牙14年選咗16個舊將! 意大利克制啲，2010年只係選咗9個，但都係偏多。
點解話多？你同佢哋各自咁多屆嘅平均比下就知。基本上衞冕隊選老鬼嘅數目，一定高過佢哋平均。合理嘅，屈開機梗係想繼續屈。但，世界盃唔同歐聯喎，4年先一次，有幾多球員真係4年後仲係頂峰狀態?實有，但係咪成隊都係？
帶出第二樣嘢，衞冕隊，基本上一定畀拎冠軍嗰隊老，因為留低舊人嘛。而同佢哋5屆平均相比，衞冕隊亦係明顯偏老嘅。你睇五屆嘅冠軍隊，都係廿六七歲（意大利一隊扯高），平均就廿六歲半。但衞冕隊平均去到廿八歲。
講咗一輪，就係用啲數據試下去說明，應該大家個直覺解釋係真嘅。成功開，就用返舊人，可能係冇戰意可能係老可能係畀人睇穿晒。但應該會一直如此。想唔想像到一個領隊大刀闊斧唔留啲捧盃功臣？點都留返十件八件的。
當然凡事有例外，西班牙拎冠軍嗰年(2010)都留咗11個舊臣（但都係少過之後衞冕分組賽出局嘅2014，16件，同埋留意平均年紀升得口吾多），德國拎冠軍嘅2014年都留咗11件，多過2018添．但你點睇都好，留得最多舊臣嘅，必定係衞冕隊，而多數都係食蕉的。
所以，在買波或打牙骹嘅角度，應該睇死衞冕冠軍的。都唔好記衞冕冠軍其實差不多一定係熱門甚至最熱。