文：阿灰（業界投稿 ）
今屆世界盃已經開始咗超過一星期，相信唔少香港球迷晌未來兩、三個星期唔夠瞓嘅情況可能會如近日港股同A股行情一樣不斷惡化！奉勸各位金融從業友好，多多保重荷包同身體！
除咗錢同健康，陪伴家人特別係家中細路都好重要。筆者近日有幸安坐家中同犬兒一齊睇波，亦係一大親子之樂。犬兒乃係「小學雞」一名，近年喜愛足球指數上升，今屆係佢人生第一次「認真」睇世界盃，但係佢心儀嘅西班牙分組賽時間不幸全部編咗晌凌晨兩點。對小學生嚟講，要瞓瞓吓凌晨起身、睇完四點再瞓多陣返學係極困難之事。其實對佢個幾廿歲老豆嚟講何嘗唔係惡頂。但係阿仔每次賽前都好堅决咁同筆者講：「爸爸，你兩點一定要叫我起身！」既然阿仔意志咁堅定，加上世界盃係四年一次，實在冇理由唔撐佢，一於「奉子」相陪啦。
同阿仔凌晨睇波，令筆者勾起兒時回憶。1982年晌西班牙主辦嘅世界盃，係香港電視台（未轉型做CCTVB之前）首次能免費轉播晒所有世界盃賽事嘅一屆(依傢反而要俾錢至睇得晒，係進步定倒退？），亦係筆者人生首次睇世界盃賽事，仲係要凌晨兩點起身睇嗰隻。筆者自細就鍾情巴西隊，薜高、蘇古迪斯時代之巴西實在太好波太吸引。但係嗰屆巴西竟然飲恨輸俾意大利。筆者當時之弱小心靈首次遭受輸波打擊即時爆喊，實在刻骨銘心。
除咗咁，令筆者印象深刻嘅就係當時有一個人陪我一齊兩點起身癲，佢就係我老豆。兒時回憶，尤其係對父母，真係有「這麼近那麼遠」之感覺。最清晰嘅記憶，唔係父母買過啲乜嘢玩具俾我、帶過我去邊度旅行、食過啲乜好嘢，而係佢哋同我玩過啲乜嘢遊戲、阿媽夜晚同我傾計讀故事書、教我捉棋、阿爸同我踢波、睇波等絲絲記憶。親力親為嘅親子活動，先至係小朋友最需要，令佢哋最難忘同最開心嘅。
今時今日嘅香港，我哋面對「世界第一」之樓價加高昂生活費，令好多人尤其為人父母嘅要日日為口奔馳。因為要工作、應酬、周圍飛，對住子女嘅時間愈來愈少，唯有將照顧同教育子女之天職「外判」。再加上智能手機及平板電腦之普及，父母好多時同仔女外出相處時都係用呢啲高科技做「褓母」，有啲中產父母就更加出親街都帶住家傭傍住「王子、公主」，令自己可以繼續望住手機，又或者同朋友食飯暢談。大家千祈咪以為帶吓仔女去play group、上吓興趣班學東學西就算係親子，呢個工作只屬家傭範疇。一啲家長又以為提供豐富物質俾仔女就已經係愛錫同盡責嘅表現。其實仔女最渴望嘅係父母同佢哋一齊參與遊戲同活動。一生難忘嘅記憶永遠都係由人與人之間之共同經歷、親身接觸去交織而成，而唔係用物質去建構。
各位金融同業、才俊們，尤其係做家長嘅，晌香港生活確實唔容易，日日做足十幾粒鐘，要供樓交租交學費交補習費上興趣班又要請工人，唔做點揾錢？又點可以儲夠錢移民？但係大家要謹記，幾忙都好，點都要抽啲時間，放下手機同平板電腦，多啲同仔女一齊玩，一齊跑跳踫，一齊睇戲睇波聽音樂打機，一日安排十五分鐘都好，筆者相信仔女必定一生都會記得：記得父母無私嘅愛。