1. 港珠澳大橋工程問題多多，又死人又工傷又有「隨機擺放」防波堤，大家都知道。但就實用性來講，大家又知唔知條橋的設計有幾無厘頭？呢張係最新的澳門衛星圖片，好清楚的顯示條橋在澳門的落腳位。大家成日話條橋去澳門，咁到底去澳門邊到呢？唔好睇澳門地方細細，落腳位置引發的旅程差異可以好大的。
2. 條橋的珠海／澳門口岸區響幅圖的最右面。圖中間係澳門半島。而口岸區同澳門半島中間光禿禿的那個島，是新填出來的「新城A區」。呢個地方目前乜都冇，港珠澳大橋駁了過去也沒用。於是澳門政府就在上臨時起了條路，加個迴旋處，然後轉向北，再起多條橋駁去黑沙環友誼橋大馬路。如果你的目的地是氹仔那邊，就由呢度上友誼橋；如果你的目的地是新口岸或新馬路那邊，就要穿過黑沙環，再兜去水塘那邊，到了外港碼頭之後再過去。
3. In other words, 如果你搭船，你在外港碼頭直接出發去你的目的地；如果你行港珠澳，你要兜一輪先可以去到外港碼頭，然後再去你的目的地。重要嗎？政府話港珠澳方便嘛。你覺得出關之後還要這樣兜一輪，方便嗎？
4. 本來唔應該咁複雜的。本來應該有輕軌，一條直線由口岸區駁去外港碼頭，然後外港碼頭再由澳門半島段的輕軌通去澳門其他地方。幾時有？你問問澳門人，連幾時動工都未知。
5. 魔鬼，永遠在細節。二十一年來，政府用了幾多高大空的講法來呃我地，句句都好聽。嚴謹少少，認真少少，你會發現，好快就會貨不對辦。