上任一年既林鄭月娥，開始認為「土地大辯論」同答英文記者一樣咁「浪費時間」，所以依家借「市民唔等得」做藉口，反口要快過土供組公佈新填海計劃直接上馬。到目前為止，好多人都問點解咁心急，唔可以等多幾個月做埋場show？
我既解釋係，佢應該做場諮詢之前，冇認真諗過佢地自己想推既野，有咁多自己答唔到既bugs，包括點解唔用土收一定要用公私合營，點解硬要將棕地「打折扣」，又點解可以咁神通廣大冇土地資訊底下知道地產商土儲係可行，但一堆堆棕土群有哂資料又話零碎唔可行。當然，佢亦都冇諗過民間短時間竟然有研究同論述能力，可以一個個擊破呢啲講法，政府同地產佬搵幾多個打手狙擊我地都無法掩蓋。
此外，佢十月諗著粗暴硬推既填海計劃，選址大部分係配合國家大灣區戰略，上面規劃既土地好明顯係分俾啲國企、中港專才區、豪宅、神秘教育城、遊艇會、大型國家級科研機構，5個已知填海區只係得一個有6-7,000個公屋居屋單位，土地大辯論過程令公眾開始漸漸為意到呢個事實，愈黎愈對佢不利。我既估計係一開始出張「點心紙」頭個幾日，林鄭都已有跡象想繞過土供組高調干預民情，當刻已經知道民意其實不在佢一方。
所以明明係林鄭一開始自己話要花18個月尋找共識，依家就直情輸打嬴要，又番番去長官意志繞過民意做事。真心去填過土供組個張「點心紙」，一心以為可以尋找共識既普通市民，真係情何以堪。
本身林鄭土地大辯論既如意算盤，係諗著「重施故技」，重覆做長遠房屋策略既諮詢模式，委任黃遠輝呢類人入去做白手套，可以擺平民間訴求去推動自己有哂前設既計劃，透過一份「民間報告」製造出她所想的「民意」，一直都以為自己呢招好灑家。在土地議題方面，就係要用這場可操縱的諮詢，打散棕土優先、善用閒置土地資源同講土地分配問題既民間議程，改為推佢自己最想攪既計劃，包括公私合營、填海同將郊野公園變成土地儲備，好可惜佢知道自己已經失敗左。
無論有幾虛擬都好，原初土地大辯論係有種下放土地發展決策權既承諾，依家就係同妳講我依家就係收番，你問我呢場土地大辯論依家重有冇實質意義，我會話已經冇，只係剩番土供組一群不願辭退的疆屍苟且偷安。連個特首都話民意係浪費時間，咁點解重值得市民重視? 不如花多啲精力直接講番如何結束土地壟斷、真正對應問題既房屋策略，無謂再同佢浪費時間。