特首林鄭月娥連日來以強橫氣勢表態撐填海，諮詢做到一半、電話抽樣民調都未做就話「社會上不少人認為填海造地是最好方案」。仲要求本來年底交諮詢報告的土地供應專責小組，要提早於9月總結民意，等佢十月施政報告唔會「交白卷」。
林鄭甚至講到明：「我希望土地小組的討論能得出這結論，不用再討論，就填海啦。那我就立刻上枱，（填海工程）撥款申請全部喺晒度」。(7月3日《信報》)
當被質疑政府是否就土地供應選項有晒前設、影響諮詢，佢就話政府官員應有自己看法，不應迴避土地供應問題。「我認為現今香港社會有甚麼可能因特首說了自己看法或意見，可以左右到社會討論？」(7月4日《頭條日報》)
咦，之但係佢兩個月前明明唔係咁講架喎！我地睇返5月8日嘅《明報》報導：「特首林鄭月娥今早出席行政會議前表示，由於已進入辯論、諮詢階段，她作為特首，不想捲入『哪個方案好，哪個方案得』的問題。......林鄭月娥又說，其中一個土地選項涉及私人遊樂場，民政事務局亦正就此諮詢，故她不認為應該現時發表自己或政府的取態。」
究竟係咩驅使佢前言不對後語？係發現扮中立都呃唔到市民、定係收咗order要做嘢呀？