全場踢足120分鐘，佢就跑足120分鐘；跑上又跑落，自己禁區見到佢，人哋禁區都見到佢；又攻又守又搶又迫，加時下半場都仲可以繼續前場迫，有一下喺俄仔禁區迫到俄仔甩波，眼看球波應該會飛出角球邊線，點知佢開行加速器，竟然最後喺出界前追得返。
攰，我諗佢其實都攰，大佬，踢足120分鐘，鐵人都死，仲要佢唔係18、22，係已經32！但就係嗰下要贏嘅意志力，令佢去到加時都繼續同你爆幾段。
全場139次觸球、102次傳送、87%傳球成功率、10次長傳、14次搶波成功、4次製造機會、1個助攻、跑動範圍全場，佢唔止係同你跑咁簡單，係長傳、短傳、較炮、控制節奏乜都有。
一個人有技術、有視野、能攻既守、勤力到唔係佢範圍之內嘅職責佢都同你做埋，如果一間公司見佢勤力就乜都畀晒佢做就真係做死佢，但為咗國家隊佢義不容辭，出晒全力同你搞掂佢。
十六強鬥丹麥後，拉傑迪透露：「摩迪已經喺球場上救咗我哋好多次，我哋係時候報答返佢。」
足球，唔可以靠一人之力，克羅地亞都唔止靠摩迪一個，但一個有魅力嘅球員，係可以用自己嘅能力去感染全隊波為你而戰，而我相信摩迪就係呢種人。