立即捐款

體育

德國首圈出局,阿根廷西班牙十六強收檔,英格蘭射贏十二碼:今屆爆冷係咪特多?

德國首圈出局,阿根廷西班牙十六強收檔,英格蘭射贏十二碼:今屆爆冷係咪特多?
廣告

廣告

德國首圈出局,西班牙阿根廷十六強收皮,英格蘭射贏十二碼。本屆世界盃異象特別多?其實唔算。

仲有四場未踢,但基本上可以畀定個結局你。今屆世界盃,同上屆(2014)比,係多咗爆冷,但只係少少。其實上屆(2014)同前一屆比(2010)先係爆冷連連。

講估邊隊波贏嘅,Elo Rating等等,其實都唔係極有用。即係好過冇,同好過其他方法咁解 — 否則個個一早發咗達。但睇返多唔多爆冷呢,呢啲應該係歷史已發生嘅嘢,用數字照計就夠準。

點解咁講?因為首先人嘅記性唔可靠,無數咁多實驗都話你知,曼德拉效應都係差不多原理。幾廿年後你會講話你明明一早就睇好俄羅斯 — 而你其實未必係講大話,因為你個腦嘅記憶都咁樣改埋,你真係以為當年你真係一早睇好俄羅斯的。呢類記憶事後自己改變嘅例子,認知科學心理學等等做過好多研究。好多女去讀的說。

另外,咩叫爆冷,又係人言人殊。講過啦,球迷往往都係未贏波前扮死狗贏咗波就話一早知道高人兩班。同樣地,對於其他球隊都係會咁諗,德國贏到瑞典就係瑞典之嘛咁拿廢,出完線就係呢隊瑞典點都勁過德國。又或者諗下,你覺得墨西哥贏德國好爆冷,但其實甚至都未入今屆五大冷門(因為其實墨西哥唔低分)。況且,一般人對於機率嘅概念其實好差。你可以諗下,平時你派五隻拎到四條煙覺得機會好低 — 但其實任何一套牌機會都係「一樣」咁低,睇你點定義個事件。同樣地,俄羅斯贏沙地阿拉伯5:0當然係冷,但佢贏沙地本身呢件事唔係冷。

所以定義爆冷,好簡單啫,賠率咯。有幾複雜?但為求簡潔起見,又即係用返Elo rating。反正以往做過啲實證,賠率跟Elo rating算係幾足嘅- 唔係十足,但一定多過跟國際足協排名,或你老哥心中嗰啲反覆無常又自相矛盾嘅排名。

未睇嘅睇舊文,費事一解再解。但簡單嚟講你贏得多Elo rating 自然就升,自然你對其他隊就係熱門,因為你係「強隊」。咁你越強,就越會預期你贏波,所以你再贏都好,加嘅分越嚟越少。相反你一輸波,特別係輸畀啲排名低嘅跌,Rating 即時急跌。反之亦然,呢個係一個自動嘅negative feedback loop.更好玩嘅係Elo rating係一個 zero sum game,你爆冷輸波跌rating,對面就係爆冷贏波拎到rating.例如德國輸畀南韓,德國一場波冇咗80分,南韓就賺咗80分。

咁所以好簡單,搵晒咁多屆世界盃,咁多場波,每場交換嘅Elo rating,咪知道多唔多爆冷咯,應該係相當科學的。當然你有齊每場賠率去做應該仲好。

我由1998年開始整理(其實都唔使好多時間),去到今年八強踢完,六屆嘅數字。揀1998年係因為第一年32隊,之前係24.咁你計下歷屆呢啲數字嘅平均數呀標準差呀,就大約睇到啲嘢。

入晒六屆世界盃整出嚟就係咁嘅東西

1. 首先,爆冷好似真係越嚟越多嘅。你亦都可以話係唔同洲份嘅差距拉近咗。因為平時好多時都係同一個洲份入面打嚟打去,咁有時啲Rating會扭曲咗。有啲去到決賽周就見真章。咁你大約見到,係多咗爆冷嘅。即係好多嘢去到決賽周先現形。例如秘魯平時對親都係南美強隊,輸波唔使點跌分贏波拎到笑,但拍埋去歐洲隊其實係爭啲的。

近屆爆冷係越嚟越多,但比上屆唔算多好多

2. 你睇平均數字,今屆係近六屆第二多冷門,但只係多2014些少,況且仲有兩場波未踢。2002年果屆先係爆得最勁。咁但係咪因為主辦國(即係韓仔啦)黑哨呢?又唔完全係。至少爆得最多唔係涉及日韓嘅賽事,而2002年唔係一兩場大爆,而係好多小爆,一大堆40–49分交換的。

3. 你睇啲交換比分嘅標準差(Standard deviation 是也),今屆亦係僅次於上屆。六屆有三屆出現過80分交換嘅賽事,今屆係其中一屆(正係南韓對德國)。今屆仲有三場60–69分交換嘅賽事,咁多屆最多 — 而今屆都未踢完

4. 另外有興趣留意嘅,今屆十六強冇乜爆冷,反而係分組賽同八強多。今屆八強爆冷係歷年最勁了。係比利時對巴西,以及英格蘭對瑞典。

5. 又留意下,平均嚟講,其實分組賽爆冷多,十六強少,去到八強又多返。個趨勢唔算好明顯,但近兩屆特別顯著。原因:因為有樣嘢叫首名次名。首名對次名,預設就減低咗啲爆冷,我估。

6. 最後列返歷屆世界盃爆冷嘅賽事。只列交換50分以上嘅。睇之前不妨自己估下,睇下你估中幾多。

近六屆世界盃的真爆冷

7. 最後彩蛋:咪講笑,唔使數都發現,德國成日上榜!六屆之中,屆屆呢啲大爆冷都有佢份 — 除左2002 — 但2002場決賽都交換超過40分 — 之後三屆都少過30。同一般人覺得佢哋「穩定」嘅刻板印象好唔同。佢地可以在不太被睇好下大炒對手(例如對巴西英格蘭阿根廷),但又會在被睇好下輸畀啲冇咁高分嘅隊,例如今年對南韓同98年對克羅地亞。當然德國上榜上得多,同佢哋成日都四強八強都有關。

原文刊在作者 Medium
作者 Facebook Page

廣告