世界盃已過，但舊文都拎出嚟講下。
話說彭博本身有搞個估世界盃嘅遊戲，我都有玩，兩萬八人排萬四，「即係同擲公字差不多」 — 但仲有萬四人墊底。
重點係佢個遊戲點玩架呢？就係你估晒分組賽嘅勝和負（但唔使估比數），咁然後咪會有晒每組排名 — 遇到同分就再問你邊隊出線咁。然後十六強又係估邊隊晉級咁，十分簡單。留意每場都計分，即係你同我一齊估中小組首次名，但你每場波勝負和啱晒，就實會高分好多。
咁到開波前，彭博有晒啲數字，就分析到一樣好有趣嘅嘢：似乎好多人忘記咗賽事除左有勝負，仲可以和波。似乎大家係系統地，嚴重地低估咗和波嘅機會。最有趣係，和波唔係咩黑天鵝或長尾事件，根本極之常見，亦唔係咩天才先估到有呢個可能。
彭博的圖
彭博話睇返大家交嘅數據，四十八場小組賽，大家平均揀咗六場和波。但實際上根據以往經驗，和波差不多係四份一機會，即係十二場。而有四份一嘅參賽者，根本一場和波都冇揀。
呢個就係一個行為經濟學上嘅經典課題了，人在心理上係傾向低估和波嘅可能，好似分到勝負開心啲。特別係彭博嘅遊戲估六十三場，你應該唔會想成日按和波。因為「和波」次次一樣，但揀隊名唔會成日一樣。我懷疑如果你只係拎一場波嚟做統計，應該冇咁多人會低估和波機會，雖然都可能仲係會。
首先係因為人只會記得大勝或者大敗，好戲劇性嘅嘢，普普通通嘅和波冇人記得，特別係悶到出汁嗰啲。正如球員入一球超靚遠射就人人記幾十年，而忽視咗呢啲倍起腳幾十球先入一球，浪費晒（好似C朗射罰球咁，之前失幾十球冇人記得，入一球就球王）。到後來有晒嚴謹數據，你發現遠射係少咗好多的 — 因為實驗證明真係入球率低，仲好多時即時送控球權畀人
另外亦有學者講不對稱誘因，要勝出呢啲遊戲最緊要夠癲。估巴西冠軍人人同你一樣啦，大把人分。最好估沙地阿拉伯，中咗你就先知 — 反正又唔使用真錢買。正如打麻雀唔打錢呢，啲人就亂咁嚟，呢個又做十三么嗰個又大四喜，明明九張落地都照打 — 正所謂「冇成本，又可以玩嘢，點解唔做」
當然，最後嘅原因，可能亦係過度自信。揀和波即係好似認自己睇唔透咁，唔似揀一隊可以大聲話「一早話德國唔夠班」咁口響
而當然啦，玩遊戲，揀一隊出嚟，就過癮過揀和波。
結果，世界盃四十八場分組賽，和咗九場波，又唔算好多咋喎。又，我都係只係揀咗五場，都係犯錯。但又唔係真金白銀買，有乜所謂？
不過下次玩呢啲估波遊戲，可以統計下，你朋友同事係咪都會傾向低估和波可能，我相信係。所以如果自己開賭（拿，犯法架）的話，可以利用呢點。