梁振英行使特權，機管局可以扮睇唔到，政府可以當無件事，但係香港人唔會。2016年3月，行李門事件發生之時，空總亦啱啱成立。當時我地知道依個問題會影響航空安全，唔止係空中服務員嘅安全，都係香港人嘅安全。於是我地膽粗粗，號召集會，2000多人來到機場，聲討機管局無視航空安全。行李門事件帶出來嘅航空安全問題，成為我地第一個要面對嘅挑戰，呢一次集會成為咗工會爭取公義嘅強心針。
即使面對香港人集會，機管局仍然冥頑不靈，為了一個特首家庭，死口不認當日做錯。逼於無奈，我地提呈司法覆核，控告機管局違法。幾位空中服務員頂住壓力，堅持司法抗爭，今日終於有個好結果。
可能啲權貴以為今日係一個空姐走去司法覆核梁振英，但真相係每個香港人都同你梁振英說不。
多謝專業嘅律師團隊，你哋令我哋知道，為咗公義，應該去到幾盡。多謝香港人，無集會給予嘅信心，空總不會走得咁遠。多謝工會，令我們可以守住專業，守到今天。
只要我哋每個人知道自己嘅位置，守住自己嘅崗位，就係守住香港。
#香港人好嘢