尋晚《新聞透視》講冰島足球，當中講到香港足總同冰島足協合作，互相派人及去當地取經，其中冰島足協經理Dagur訪港五日，僅僅五日佢已經睇到冰島同香港嘅分別，佢講咗呢番說話，一矢中的：
「冰島同香港最大分別，係大家對待足球為職業嗰種嘅決心。冰島年輕人喺足球上睇到機會，可以去歐洲球會效力， 靠足球改變人生，但香港年輕人嘅首選唔係足球，而係學業。」
唔講唔知，冰島政府好鼓勵小朋友參加課外活動，每個小朋友每年可以獲得400蚊歐羅嘅資助（大約$3600hkd），而家長亦好樂意帶小朋友去附近球會訓練。其中，記者訪曾經問咗一位冰島小朋友，關於每日嘅訓練時間表：
記者：「你每日踢幾耐呀？」
小朋友：「四個鐘。」
記者：「咁做功課呢？」
小朋友：「20分鐘左右。」
換轉香港？係調返轉，4個鐘做功課，20分鐘踢波，甚至連嗰20分鐘都拎埋去做功課。香港人從來唔會覺得體育搵到錢。錢，冇錯，又係錢，睇返香港，根本成個價值觀唔止講緊「冇前途」，而係講緊「冇錢途」。
錢，可以話係香港嘅核心價值，點樣搵錢就係人生目標。最好就係個個都有個「大瘤」做老竇，細細個就畀10萬蚊你。體育？唔好喇，點解呀？體育搵唔到錢嘛！但諷刺嘅係，當你透過體育搵到錢，又會畀人屌掛住搵錢唔練習、掛住搵錢搞到拎唔到獎。
無論嗰樣嘢幾正面，只要拉埋去講錢，一切都變得好邪惡，邪惡到連自己人都唔會撐自己人。
Dargur亦講咗段好啱嘅說話：「每個地方都嘅發展條件都唔一樣，設施、政策、硬件可以複製，但文化因素冇可能複製。」
就算香港小朋友幾想成為職業足球員都好，呢種社會氣氛令佢哋唔會／唔敢諗，唔係一朝一夕可以改變，正正就係Dagur所講，唔係可以複製得到。
唔止香港嘅文化因素，就連所謂嘅配套都係不知所謂。已經唔講政府花幾多錢去起大白象工程，起完又再拆；就算政府真係投放大量資源，其實都只係形式上嘅門面功夫，甚至只係「益」緊足總架構入嘅人。早排有線《新聞刺針》透露，足總薪酬年年澎漲，當中政府撥款嘅5000萬發展，有84％係用作薪酬開資，即係話成筆錢嘅發展都係用嚟出人工。你話做到嘢嘅人工都無話可說，但問題而家你係做唔到嘛！上樑不正下樑歪，一個咁嘅生態環境下，做嘅嘢點會好？
當我哋好羨慕冰島好勁好團結，然後反問：「點解冰島得？香港唔得？」，其實真係好可笑，因為當你知道核心上嘅分別，你就會知道，最大分別唔係地理位置、人口密度、甚至人種問題，而係嗰種無形但又實在嘅文化核心價值，永遠都冇得同冰島鬥…冰島鬥…冰島鬥…鬥呀…鬥呀…鬥呀…
截圖：TVB新聞透視