立即捐款

政經

昨天風災,今天人禍

昨天風災,今天人禍
廣告

廣告

香港啲官成日講獅子山下精神。乜嘢叫獅子山下精神?就係打完個世紀風翌日,滿街碎片塌樹,危機四伏嘅日子,兼夾很多地方冇巴士冇地鐵,都仍然堅持上班,披荊斬棘,開天闢地,為咗乞求僱主留情,唔好扣你人工扣你假,你就只好想盡辦法返工。

你可以美其名為「盡責」,如果你人生只需對工作盡責,以及盡責的意義就係每月出糧畀養家,而唔需要對家人嘅關係負責,即係如果你中途喪命,你唔可以供樓交租畀家用,你家人唔會流一滴淚,咁你博晒老命返工,真係100%盡責。不過咁喎,今日返工嘅,幾多係有孩子嘅家長?佢哋最需要嘅唔係你搵多多錢供佢哋讀十個課程讀國際學校,而係喺佢哋成長時有你哋喺身邊。全城咁多危機,冒險返工,冇咗條命,或者受重傷,咁對家人又係咪叫「負責」?

工作盡責,係應該嘅,問題係,只要你唔再係公司嘅僱員,你同公司咩關係都冇,你公司一滴淚都唔會流。但你條命冇咗,有好多人就同你斷咗關係,會傷心一世。兩害相權,如果要盡責,究竟應該對公司還是家人?

香港從來將呢啲事搞錯咗,好聽啲講叫盡責,難聽啲講叫奴性。獅子山下精神曾經值得推許,因為喺英殖時代,你努力盡責克服重重困難去返工,你真係可以向上流動,安居樂業,窮都可以快樂過每一天,因為你對未來有希望,所以無論最初幾困難,住木屋、住山邊、住天台咩都好,你勤力大多都有好好的回報,至少你確實感到有希望。今日呢?講咩獅子山下精神?你努力克服風災後嘅重重險阻,你得到咩?加人工?升職?Sorry,今日係講靠父幹、靠關係和靠攀附嘅時代,你幾廢都好,加入建制擦高官鞋,你可以平步青雲;你幾有實力又如何?你冇關係冇人事冇父幹,你就畀心機返工,買樓唔使旨意,買咗樓就死頂供樓,最大贏家係地產商,你乜希望都冇,仲要有人鼓勵你——「我廿三歲老豆就借十萬畀我創業」、「我十歲生日就有十萬利是」——看,青年人都充滿希望啊!

獅子山下精神?依家仲有人會信呢啲鬼話,一啲反抗意志都冇,僱主幾無良就幾無良,你一句聲都唔敢出。

最好笑,仲有人附和湯渣驊,話政府冇權力命令全港放假一天。先勿論有網民已指出法例係賦予咗呢個權力畀政府,剩係講講帶頭作用吧。好多嘢政府冇權力都會帶頭做,例如政府從來冇立例規定要五天工作,做咩佢要帶頭做?又做乜越來越多機構跟?因為政府係最具權威嘅組織,其倡議很自然成為一種非法定指標,當然你可以唔跟,但有好多人會考慮跟。首先,即使政府民望低迷,但「政府都咁講」一向係一種壓力,僱員、工會都可以用呢樣嘢來要求僱主做啲嘢,或至少唔敢衰得咁盡。如果有啲公司死都唔跟,爆出來也會受到輿論壓力;第二,與政府類近的公營機構或受政府資助的機構會最快考慮跟隨,以免畀人有話柄;第三,理論上,大商家從來都要睇政府面色,因為與政府友好點都係有利經商的,即使民主社會,商家都會與政府保持友好關係,只係民主制度的政權更替令佢哋唔可以買起某一個陣營而為所欲為。

所以,政府帶頭,就有讓社會各界跟從的權威效果。只要今朝政府講一句,非緊急服務嘅工作應該停工或在家工作,而十幾萬公務員會率先落實,一般政府部門唔辦公,包括港股停市,呢一個帶頭,今朝就至少少幾十萬人出來迫,再加上不同嘅私人公司跟隨,即使還有無良僱主,也大大減少今早的交通負苛。大公司顧住形象,加上政府部門唔辦公其實好多嘢做唔到,咁順吓政府意,就係順水推舟順理成章,不如叫僱員在家上班或自願上班(其實放咗假啲嘢都係堆埋一日做兩日嘢),免得爆咗出嚟引發公關災難,出到去應酬飯局畀人寸,仲可以乘機話「我哋好尊重政府意見所以停工」擦吓鞋;細公司呢?其實佢哋唔會無端端良心發現,甚至無諗過實際情況(很多僱主都好離地),但你同佢講一句「政府話今日要停工喎」,佢個腦先會諗諗今日係咪要停工,有一半覺得「政府都咁講不如停工啦」,咁又少一半人唔使出來迫(香港人好聽政府話架嘛)。

但係話返轉頭,呢個政府又點會咁做呢?因為個特首係由大僱主選出嚟嘅,所以個關係剛好調返轉,係林鄭要聽大僱主話,大商家先係權威,所以政府高官當然企喺商家嗰邊啦!連唔連任,睇佢哋頭架喎;局長退休,都想奉佢哋為老闆喎。咁現實啲講,換轉係你,你企喺邊邊?

這就是917人禍的死結。所以,你今日幾嬲都冇用,這就是政治現實。一係你下屆唔好投林鄭月娥囉——哎吔,講錯咗,你哋從來都冇得投!畀心機工作,返工小心啲!

廣告