777呢刻個心應該仲未知自己衰乜，佢可能覺得市民太刁蠻，剩係識鬧，一Ｄ都唔識欣賞佢嘅「功績」，包括一號風球已開動跨部門應變計劃、超級颱風下零死亡數字、全港學校停課等等，講真，今次政府上半場算係踢得唔差，起碼叫做吸取到澳門上年嘅教訓，問題係，佢太早自滿喇，早喺風球由10號變8號一刹，佢已急不及待衝出來「成功爭取」，左一句「舒一口氣」，右一句「安然度過」，完全無視大批市民斷水斷電爆玻璃，亦都唔理港鐵事先張揚翌日唔可以全面恢復嘅危機。
當我一聽到港鐵出事，喱民如我心裡都知道金翅XX了，但777果然天生異稟，又或許佢已經畀上半場嘅「勝利」冲昏頭腦，佢真係可以當冇嘢。而更大劑嘅事佢一樣唔理：九龍好多主要道路畀樹木block晒(google map都睇到啦)，幾乎肯定，九巴唔開車呢個決定，係基於運輸署同路政署嘅資料，換句話，交通網出咗事，政府係知得最多，亦知得最早。
深心不忿嘅777，一定覺得叫僱員同僱主自己傾掂，已經係皇恩浩盪，從來邊有特首咁闊佬呢？早上佢更加出口叫老闆唔好扣人工，又話工務員已經係咁做(後來被踢爆下午三點先出email)，但市民仍然唔領情。
講咗咁耐，嚟到重點。今次777對打工仔嘅態度，係「打發」，而唔係幫。打發人同幫人係好似架，都係做Ｄ嘢去解決對方一Ｄ問題，但實際上差好遠！首先，「打發人」同「幫人」嘅面口真係好唔同；「打發」係付出最少，只求令對方唔好煩住自己、「打發」係唔會諗有乜更好嘅方法、「打發」係只顧自己感受，而最大嘅分別，係對方好容易感覺到「被打發」同「被幫」嘅分別，感受因此亦有天淵之別。
再舉個例，上年777畀五百蚊行乞者，呢個就係典型嘅打發。相信佢到今日都唔明，畀五舊水乞兒點解都畀人閙？唔通要畀夠一千？情況同今次真係一模一樣，唔係銀碼嘅問題。打發定係幫？市民完全分得到。
有人話，如果777請個好Ｄ嘅公關，會唔會冇咁肉酸？我諗，一個人嘅質地係點，關公都幫唔多太多。仲記唔記得777幾星期前開過fb live? Iive嘅精髓在於網民可實時留comment，開live嘅人又可即時回應，否則開live係完全冇意義。不過777竟然做得出成個live完全冇望個mon，連作狀放部電腦喺面前都慳返，只尤得身旁兩位PR疲此奔命咁幫佢censor問題。
所以，關公係重要，但首先，你要有得救先。