立即捐款

政經

實地考察住深圳搭高鐵返香港工有幾現實

實地考察住深圳搭高鐵返香港工有幾現實
廣告

廣告

之前寫過香港人有冇可能住深圳然後日日搭高鐵返香港工,回應港鐵主席馬時亨就香港青年可考慮在內地置業的所謂建議。高鐵就快通車了,我係地理學出身的,既然現實已在眼前,點都要做次 ground truthing 啦係咪?今日就同大家一齊去深圳睇樓好冇?

首先,都係要設定比較基線先。從西九龍出發,乘高鐵往福田站要14分鐘,往深圳北站要23分鐘;相對來說,從柯士甸站乘西鐵往天水圍站要26分鐘。當然,高鐵要加上出入境的時間,高鐵班次又比西鐵疏⋯⋯港鐵早前建議乘客預早45分鐘到達西九龍站,如果計足的話高鐵時間上會輸得好甘,我們暫且就當由西九去天水圍同去深圳差不多算了。

接下來,我們要設定搵盤範圍。我這兒設定為出站步行十分鐘之內,理由有二:1)步行多於十分鐘,日日行會頂唔順;2)遠到要駁車的話,就要問及駁車那一程的班次,研究模型會變太複雜,乘車時間本身也太長。

首先睇福田站。


睇下福田站有幾咁大!(但係又唔知點解冇位做一地兩檢⋯⋯)

福田站附近有兩片住宅小區,靠近購物公園地鐵站一帶的有中海華庭、城中雅苑同星河.國際,靠近福田地鐵站一帶有黃埔雅苑,兩片小區和福田高鐵站的步行距離都不足十分鐘(以高鐵站檢票口和最近高鐵站的那一座計)。


高鐵站內街道圖

以下是各小區實景:


呢個係中海華庭


呢個係城中雅苑


呢個係星河.國際


呢個係黃埔雅苑

城中雅苑門口有幾間地產代理,我拍了張相:

記住,你睇緊的是人民幣。現在人民幣兌緊1.153, 750萬人民幣即係864萬港紙。銀碼大的其中一個原因,是因為呎數大。這堆盤下下過千呎,當然不會平。但更重要的,老老實實,福田站本身就是深圳市最中心的地方,呢度樓貴完全唔奇。

值得一提的,是租的話表面上好似幾抵,一萬三人民幣已經過千呎,放在天水圍嘉湖山莊只會租一個細好多的單位(雖然都有三房)。但不要忘記,時間距離雖然相若,車費卻不是。天水圍的話兩人每日二十日來回車費八達通價是$20.5x2x2x20=$1,640, 全月通價是 $585x2=$1170 ;福田呢,高鐵價就是$78x2x2x20=$6,240。一計埋車費,住福田日日搭高鐵返香港又唔多抵了。

好,福田搞唔掂,我地去遠少少,上深圳北站。


深圳北站東廣場

正常去深圳北站,都係去東廣場的正門。不過現成的大型住宅小區都在西廣場那邊。


呢個叫龍悅居

一過西廣場,就見到一大片的整整齊齊的新樓,步行距離不足五分鐘,嘩,唔通真係有得諗?


個格調真係好似香港公屋

再行近少少,咦,點解咁似公屋?再睇睇附近地產代理,賣的都不是這兒的單位,到底乜事?原來呢度叫龍悅居,是深圳的保障性住房來的。咁附近有冇私樓?隔離有兩個盤:


呢個叫熙園山院


呢個叫聖.莫麗斯

我在附近地產鋪見唔到相關放盤,上網睇鏈家就話熙園山院賣緊98,176人民幣一平米,即係10,514港幣一建呎,其實貴過嘉湖山莊;聖.莫麗斯就平少少,83,552人民幣一平米,即係8,948港幣一建呎。不過單位都係超級大,下下二千幾呎四房兩廳、五房兩廳,成交價最少都1600萬人民幣,唔好諗喇。

咁到底高鐵站附近有冇平價盤可買呢?有,首先我們要回去東廣場,然後望出去:


再望遠少少

在東廣場出面有個大公園,公園後面有一排樓,就係今日最終目的地了:


首先穿過個公園先


然後穿過呢個天橋底


呢個時候我已經攰到自拍都唔知


終於到目的地

行了超過十分鐘之後(okay, 我犯了規,但步行十分鐘之內真係搵唔到),終於來到呢個叫「樟杭一區」的地方。樟杭是一條城中村,即是本來是村落,但因為城市擴張而變成城市的一部分。這種地方的特色是建築比較雜亂,但價錢十分相宜。在這兒租個400呎單位,只係要2000人民幣左右。係咪好抵?不過去到呢個位,每月高鐵車費已經係$86x2x2x20=$6880了。當計埋個總額已經上到九千的時候,又點解仲要來深圳住城中村呢?


兩房一廳128萬急走!

Actually, 我信有人會過樣做的。不是馬時亨說的在香港買不起樓的人,而是本身就住在深圳的香港人。不少香港人因為各種原因(如中港家庭)而住在深圳,本身在深圳也不是住什麼豪宅,高鐵通車後說不定可以給他們多些選擇的。只是對於本來沒有必要住在深圳的香港人來說,這些選擇就不見得那麼吸引了。

成件事,其實好簡單。深圳的高鐵站本身對深圳市來講,就係要發展成交通樞紐的地方,所以房價唔會平得去邊;就算起平價樓,都益深圳人自己住先(保障性房屋);要去到質素好差的樓,先會有可能交通方便得來價錢又平。

這堆東西,馬時亨唔會同你講,因為我好懷疑佢唔知;最起碼,佢應該冇好似我咁樣ground truth過一次。

又或者咁講,那些成日叫我們多認識中國的達官貴人,其實講真佢自己有幾全面認識中國?還是只不過借這句話來表演忠誠罷了?

廣告