立即捐款

足球說故事

你看足球,我說故事。 網誌

體育

咪做「萬事怨」嘅隊友

咪做「萬事怨」嘅隊友
廣告

廣告

最近踢波遇到一位世界級波牛,世界級到令我踢住波都要分心留意佢。唔好誤會,我講嘅唔係佢嘅球技,而係佢埋怨隊友嘅程度,嚴格嚟講,係直迫「咒怨級」。

由開波嗰刻佢已經嘈生晒,以下係我留意到嘅細節:

1)隊友傳失波即鬧:「唉你真係好廢!」自己傳失或者傳得差,都係會鬧隊友:「你埋嚟迎波啦嘛,企喺度托呀?」,完全彰顯到輸打贏要嘅精髓;

2)隊友射波唔入即鬧:「咁你都唔入呀?唉,你死啦去」。講緊唔係幾碼嘅必入波,而係普通一腳禁區外射門。我諗喺佢眼中應該係每一腳射門都必定要轉化成入球;

3)隊友一拎波就嗌隊友傳波畀佢:「師兄,你見唔見到我呀?下?」;比完佢又會拖慢個節奏喺度嗌:「走位啦唉,企喺度托咩。」/,隊友走咗位,佢就會搵其他嘢鬧:「走快啲啦」;

4)隊友一扭波就鬧:「扭完未呀?扭扭扭」,但係佢自己拎住個波死扭就得㗎喎,最好笑係隊友叫佢唔好扭,佢竟然係鬧隊友「你收嗲啦」;

頭幾次嗌,我會覺得佢係提醒隊友要點做,但當每一次隊友掂波佢就嗌一次,態度仲要係怨波嗰隻,怨下怨下連隊友傳波傳畀佢鬧:「傳咁大力做乜呀」,猶如全世界人都得罪咗佢,嗰刻我唔係佢隊友都覺得呢條友好撚煩,更何況係畀佢過嘅隊友都愈踢愈無癮,完全無晒心機。你話佢啲隊友係咪豬隊友所以佢先咁嬲?我同我嘅隊友一啲都唔覺,有幾個幾好波,仲好波過喺度怨嗰個㖭。

我明白好辛苦先做到一個攻勢但輕易被截斷個種氣憤感受,但係當個波都仲喺你腳下時,你都咁樣對待你嘅隊友,呢啲態度唔要得之餘,亦係非常無品。

波,係成隊一齊踢,就算你強如C朗美斯,你都要靠隊友幫你,互相補位,互補不足。即使你係隊長都唔代表可以亂鬧人亂發脾氣。犯錯唔係唔話得,但唔係即場發脾氣埋怨,鬧佢廢屌佢屎波係冇用。

又咁講,你係有道理地鬧,有邊個會唔服?

失波鼓勵一句,總比埋怨一句好。呢啲唔係叫放縱,而係俾信心佢。你對佢冇信心,何來踢得出好波?點解有時明明實力差距甚大都可以同對方打成均勢?因為場上成隊都好團結好齊心,你補我我補你,最重要係大家失波或交失波唔會怨而係鼓勵一聲:

「好波好波!」
「good try! 」
「唔緊要,再做過!」

有時候踢波唔止講技術,仲有講你隊波係咪一條心!

多一句鼓勵,少一句埋怨,對你、對隊友,定對隊波都係有利無害。就算唔鼓勵都唔好怨波,唔好做令隊友討厭嘅「萬事怨」。

足球說故事 Facebook Page

廣告