除咗華仔「真情」力推嘅填海之外，政府另外在10月最新施政報告極力想推嘅項目，就係地產商都虎視眈眈嘅「公私合營」開發新界囤積的農地：「公私合營」即是由政府出基建，再由地產商起屋，過程中會起返少少「公營」房屋出黎，皆大歡喜咁話。
咪住先，查翻呢幾年既全球物業發展，可以發現香港地產商已經一早越洋英國同當地政府攪公私合營架啦。例如香港公司Knight Dragon，喺倫敦泰晤士河套一塊市區靚地起樓，可以興建成1萬5千個住宅單位。呢個名為Greenwich Peninsula嘅樓盤，係當今倫敦東最大型嘅綜合商住發展計劃（註1）。
根據當地政府對新住宅項目嘅規定，呢類私樓發展必須將35-50%單位撥作可負擔房屋（affordable housing），包括市值一半租金嘅廉租單位同折扣價出售單位，先會獲得發展許可。所以呢個咁大型嘅發展項目，就規訂最少要有約5970個可負擔房屋單位提供。
但係玩慣左地產霸權鑽空子嘅香港地產商，又會唔會真係咁乖乖起平價屋俾普通市民呢? 根據最新資料，原先規定要呢間地產商要起38%嘅單位做可負擔房屋，但係Knight Dragon利用左一個黑技術 －可行性測試（viability test）。透過可行性測試，原來係可以容許發展商一旦證明項目「賺唔到錢」，就可以起少啲可負擔房屋單位。出錢搵個顧問做個研究報告，就咁由原本5970個（38%），大減至3930個（25%），就咁就呃走左約2,000個一早承諾嘅可負擔房屋單位。呢個香港地產商走數嘅行為形同「港蝗」，炒貴人地啲樓又唔跟政策要求，諗著賺到盡犧牲公眾利益，引起左英國社會對公私合營嘅公憤。
最可恥嘅係，項目喺今年中開售，一房同三房分別最低價都高達601萬同2,240萬港幣，呎價高達13,000港元，貼近香港樓市嘅癲價。其實倫敦樓價過去幾年英國樓價都無大調整過，好明顯就係地產商聯同顧問公司玩弄緊規劃制度，做到盤數賺唔到錢，架空地方政府訂立嘅「可負擔房屋」供應策略，同喺香港玩規劃制度既方式同出一轍，事頭婆嘅後花園都冇面俾。
追溯返果個走數發展商嘅背景，原來Knight Dragon嘅主席就喺四大地產商之一、新世界集團嘅鄭家純。而佢亦擔任緊岩岩請咗華仔賣廣告嘅團結香港基金副主席，睇黎華仔都唔知佢啲金主走數有幾醒喎。同時，新世界亦係新界大地主之一，最新數字係囤積近1700萬呎農地儲備，依家林鄭、地產商同土地供應小組夾計攪緊個新「公私合營」模式，保障佢地唔被收回土地幫埋佢地起路發展規劃，相信又會俾呢啲慣犯繼續破壞公眾利益。
大家諗下，規劃制度相對透明嘅英國，都畀香港地產商搵笨。香港政府近日仲放風話，「公私合營」嘅中，公營房屋單位數目將會「由政府與發展商溝通」、「視乎清況而訂」、有「獨立機制」，龍門隨時搬都得，搵鬼信呀？香港地產商充滿國際走數經驗，連事頭婆腳下都夠膽呃，你估對住林鄭呢個話唔到事嘅妹仔，仲唔玩到佢盡？
地產商喺外地公私合營走數已經明目張膽，依家政府仲要摏個頭埋去攪公私合營，同無時無刻都諗著賺到盡嘅地產商「與虎謀皮」，你話呢個同鄭家純同姓三分親嘅妹仔係咪真係好有可疑？
#一起走數的日子
#事頭婆都管我唔住_就憑一個妹仔就管得我住？
#公私合營