立即捐款

Momay

我係熱愛足球嘅油漆佬。 網誌

體育

撐起港丙,由你開始

撐起港丙,由你開始
廣告

廣告

由於起身睜大眼一刻即時唔知做乜閃出葵廣台灣腸五字,咁我咪去葵運睇返場丙組頭場先,今季丙組最有睇頭嘅就係有愉園舊將助陣嘅車路士,開皮冇耐已經嚟料,不過上季黑馬國強繼續強旺,現時已經反壓車仔排第一,但距離完季仲有一段時間,唔排除仲有球隊後起。

而尋晚我係諗過今日去大坑東、花墟、大西北、蒲甲聯、港版圖瓦共和國古洞同馬鞍山,但我有一個恐怖習慣,就係要等第二日睜大眼一刻先決定,呢種無定向鳩睇方程式係我由1999年開始正式入場睇香港足球聯賽後培育出嚟,至今仲未有特別追捧同支持嘅球隊,就算北區隊我都仲係覺得冇乜特別感覺,純粹因為近先睇得多啲就好似流川揀湘北嗰個原因咁,即係如果足總安排比賽喺打鼓嶺進行,就算係五人聯賽我睇嘅次數都會密啲。另外我覺得上水、粉嶺、沙頭角、打鼓嶺係四個好唔同嘅地方,雖然四個地方喺生活上有好多關連,例如要用公共交通工具入打鼓嶺及沙頭角要喺上水粉嶺搭車入去,打鼓嶺連一間超級市場都冇,要買日常生活用品就要去上粉,但係由於覺得打鼓嶺嘅文化特色同三地有別,生活亦係兩個世界,種種因素令我比較傾向叫自己做打鼓嶺人多過北區人,所以我並冇喺北區隊身上揾到所謂歸屬感,因為我一向覺得北區定位界線好糢糊不清。

所以我經常走嚟走去,有時會喺蒲崗村,有時會喺跑馬地,有時又返去九龍仔,然後又去咗兆麟,跟住又東行出現喺西貢,再標上去粉嶺,斜插去古洞,然後轟一聲又出現喺青衣睇港超聯,啲現實識我嘅球迷見到我喺場內遊盪就會好驚訝咁問:「吓?你唔係睇丙組咩?走嚟呢度把托呀?」

其實揾到一支你自己支持嘅足球球隊,已經係一件好幸福嘅事,揾嚟揾去揾唔到,咪好似我咁,如一個無家可歸嘅流浪漢一樣四圍去。

可能嗰天一直暗示,我要投靠老垃。

廣告