立即捐款

Momay

我係熱愛足球嘅油漆佬。 網誌

體育

城門谷?正呀喂!

城門谷?正呀喂!
廣告

廣告

由凌晨四點半出發行路去城門谷,終於喺下午一點幾到達終點,就係城門谷運動場,今日呢度有乙丙組雙料娛樂,由於係免費入場,所以頭場吸引大約十位球迷到場觀看比賽,場面非常火爆。

頭場由乙組嘅觀塘對光華,如果睇積分同人腳,觀塘可能會畀光華好,觀塘隊中有唔少好波之人,例如隊長梁文軒同射手吳文希,而光華雖然都有李榮基、陳逸衡同溫子康等猛將,但整體人腳似乎唔及觀塘好,聯賽戰積亦有所反映。

不過事實又係咪咁呢?今場波顯示兩隊實力其實差唔多,而光華嚴密嘅防守令觀塘冇乜計仔,中場極多失誤亦令觀塘埋下輸波伏線,主要踢反擊嘅光華射門次數甚至遠比觀塘多,只不過好多遠射角度太正,但就係憑住上半場初段一球冇角度但係嗰球彈咗吓地嘅遠射,光華以1比0險勝。

我相信今季乙組北區應該甩咗出嚟,但另一個升班名額係邊隊就好難講住,業餘聯賽有佢哋嘅因素,有啲球隊起初可能係威係勢,但知道班主決定無意升班就會放軟手腳完全享受比賽,令到形勢唔同晒,呢種現象近年減少咗,但搞波要錢,甲組同乙組預算都可以好唔同,呢種現象出現都係冇辦法。

而講返個場,今季係我第二次嚟呢度睇比賽,睇波角度嚟講好撚掂,不過由於位置問題,頂級聯賽唔會喺到搞比賽。其實我自己覺得喺大窩口地窿行上嚟都唔係好耐,可能打鼓嶺行去荃灣都試過咯,覺得大窩口行上城門谷真係極端小兒科。

廣告