1. 不知不覺，連「小學雞」艾沙雲都低調地宣布退役。
2. 最初莫講叫佢做「小學雞」，其實就連佢叫「艾沙雲」都唔係好知，只記得傳媒曾經報道過，有個俄仔帶領辛尼特歷史性奪得足協盃冠軍，仲當選埋全場最佳球員。
3. 對於我，真正認識艾沙雲係08年歐國盃八強對荷蘭嗰場波。嗰陣嘅荷蘭分組賽所向披靡，3戰全勝入9球失1球；相反俄羅斯只係次名出戰，入波同失波都係得4球，情況就好似賭俠想拎10蚊贏2500萬，邊有可能呀？除非有特異攻能嘅星仔助陣啦，而當年嘅艾沙雲就係呢個人。
4. 百二分鐘入面入1球1助攻，幾乎係一個人搞掂荷蘭，贏3－1嗰球佢充分利用「界外球唔計越位」嘅規則，再用假身呃過後追防守嘅奧查，繼而射穿雲達沙大細龍門。嗰一刻，已經冇人唔識呢位「沙皇」。
5. BTW，其實我都唔明點解當年艾沙雲會揀阿仙奴。講起呢單轉會真係經典，過程一波N折，去到冬季轉會窗最後一日都仲拗緊嗰120萬差價（一貫雲加作風）；好喇好喇，艾沙雲自己倒貼120萬出嚟，點知無啦啦fax機壞咗、又大風雪影響航班，有傳媒已經報道轉會破裂，個個都打定輸數，但最後一刻又畀佢加盟到（聽聞最後搞到用email確認轉會）。如果轉會市場都有「七不思議」，呢單轉會肯定榜上有名。
6. 講真，艾沙雲真係當年阿仙奴嘅及時雨。加盟半季13場比賽踢咗12場，6個入球8個助攻，只係半季時間，呢個一臉稚氣嘅「23號仔」已經成功征服咗一班阿仙奴球迷，令佢哋喺貧困絕境中見到一絲希望。（不過好記得加盟初期真係場場70分鐘貨仔）
7. 一場波有8個入球出現勁啲？定係一個人入4球勁啲？我都唔知，只係知艾沙雲首次到訪晏菲路就上演「大四喜」，我永遠都會記得佢入到第4球舉起嗰4隻手指嘅慶祝動作。呢隻小學雞，一啲都唔弱雞。
8. 題外話，呢隻小學雞點解叫小學雞？明明3張野都仲係童顏樣，企埋去啲小朋友堆毫無違和感，舉手頭足成個小學生咁，望住佢硬係有種莫名嘅喜感，睇親佢啲相就好好笑，表情冇張正常。我諗呢個都係其中一個原因令人對佢念念不忘。
9. 講真，艾沙雲喺我眼中絕對係好波之人，但無奈呢隻小學雞嘅高峰好短暫。一個人狀態忽然下滑有好多個原因，受傷所致？年紀問題？沉迷酒色？定係教練錯用？真係唔知，但當你見到米9嘅LORD賓打右中場，出波畀打正前、只有米7嘅艾沙雲頂波，成件事就會覺得9唔L搭8，唔多唔少雲加錯用都影響咗佢嘅表現，只差在呢個到底係咪主因。
10. 老人家批評艾沙雲欠缺鬥心，去到後期直情雪埋沙皇用都唔用，最後再將佢返去辛尼特。老人家話希望佢可以返俄羅斯搵返鬥志，但嗰陣嘅艾沙雲已經唔係加盟嗰陣咁L屈機。翌季，艾沙雲結束當兵生涯，正式回歸辛尼特，從此淡出球迷視線。
11. 偶爾都會聽到艾沙雲嘅消息，聽聞都有一段小陽春，但係佢已經唔再係傳媒筆下追蹤嘅重點，過成點都好似冇人care了…
12. 由成名到全盛再到迷失，成個過程都好似只係幾年嘅事。
13. 有啲人高峰時間真係好短暫，但已經足夠令人記住佢有幾勁。
14. 37歲，掛靴，呢隻小學雞，終於小學畢業。