立即捐款

國際

大陸幼稚園爆煲,足證香港係宜居之地,樓點會平?想平去加拉加斯啦

大陸幼稚園爆煲,足證香港係宜居之地,樓點會平?想平去加拉加斯啦
廣告

廣告

前言:本文誕生,多得有美女/才女作家(佢肯定會唔高興,但我話係就係啦)話有睇我上一篇文。我嘅弱點就係無法抵抗任何人話「我有睇你篇文」,於是呢排原本冇乜心機寫文(唔使返工係咁架啦,幾時都係在公司寫自己文最掂),都燃返起。

不過我個人就係咁衰,為免你一早知我嘅弱點,所以你話睇過我嘅文,我就問邊篇。美女/才女話係篇長文,仲講得出內容。噢,可惜唔係陳德霖put,係高海寧。其實我心中兩三千字係正常,去到六八千嗰啲先叫長文。但無論如何高海寧嘅preview係收視保證,入面寫乜我估冇乜人理

正題:先講隻股票,RYB,惡名昭彰嘅紅黃藍教育。大陸公司美國上市。執筆之時(香港半夜兩點半)跌緊五成半。

原因不外乎都係政策嘢,大陸嘛,你懂的。

我反而想講嘅係,呢間紅黃藍之前都爆過鑊,好大鑊,性侵虐待乜都齊。當時都引起一陣討論,特別係如果有用微信嘅(例如我)會見到朋友圈洗晒板。況且,呢檀嘢當時仲震散香港上市堆教育股。教育股,唔係香港補習社嗰啲(嗰啲係建築股飲食股同印刷股,搭棚渣鑊鏟印公仔紙先係主要業務),係大陸嗰堆。舊年升到得人驚,今年跌得一樣得人驚。

而我冇小朋友,不關心喪鐘為誰而敲,只係睇股票。當時教育股尊尼亞同事以及眾多媽媽sales 講一大輪,由股票講到為人母親甚艱難。最後有人問我點睇,本人懶有哲理咁講句:長遠嚟講呢, 利好香港地產股。

媽媽級仙尼亞分析員先係愕一愕,然後 表示十分同意。 畢竟佢都係大陸人,亦係人老母,自然用腳投票。呢間美國上市公司仲要大學校都咁,可想而知仲有幾多未揭發。唔想仔女畀人拮針搞下面,梗係送出外國。英美固然可以,但如果太細未自立,或者近老母老豆返工,梗係香港

都係嗰個理論:現實就係,你覺得香港退步,我不反對,反正呢啲好主觀。但,你心中嘅香港,可能由(whenever you like)以前嘅八十分,倒退到五十分。不過樓上班同胞活在廿分之中嘛!點會唔仆到嚟?

少講政治。但在呢個層面下,的確本土青(其實都唔只佢地)成日講嘅「大陸越仆街香港越掂」係真的。完全言之成理。香港雖則都畀人話「大陸化」,但你諗下好似紅黃藍之類 拮針搞後庭搞下面,都仲係冇咁易嘅。就算有都唔會咁大規模,就算有咁大規模都唔會事後不了了之嘛。

如果大陸有香港咁好,就使撚搬嚟香港咩。亦係我嘅理論(都唔係咩高深理論),在我第一次去歐洲坐火車時發現:就係啲煙鏟自己都要走過嚟非吸煙區!因為煙鏟自己都唔鍾意煙味,頂多鍾意自己嗰啲,自己嘅煙就香,人地嘅煙就臭,同屁一樣。古語有云:

意見像屁眼,人人都有,而總覺得人地臭。Opinions are like assholes, everyone has one but they think each others stink

寫篇文呢晚正去咗獅子山學會嘅週年晚宴(要屌請屌)。但重點係嘉賓講者Gloria Álvarez,大有來頭。即係我覺得維基百科有條目嘅人就有來頭。況且佢又係主播又係作家仲係異見份子。嚟自邊?危地馬拉。講你都唔知在邊架啦,唔係在馬拉啦。

講返,Gloria Álvarez講嘅好簡單,社會主義注定失敗,害死好多人。本人自然不能同意更多,而居然而家仲有人可以討論馬克思主義共產主義破產未。Gloria 講返拉丁美洲嘅左傾(其實係查維斯式社會主義)政權。最出名固然係委內瑞拉嘅查維斯Hugo Chávez,同埋佢繼任人馬杜羅Nicolás Maduro。委內瑞拉咩環境,就日日在新聞都見到了。

同場加映,之前我都寫(其實主要係譯)講過拉丁美洲嘅左翼政權。係喎,拉丁美洲政局我都有留意,識如果神掌又話你知咩。

古巴,尼加拉瓜,委內瑞拉。呢班友,基本上都係搞到一鑊泡。而程度有深淺,最原教旨嘅委內瑞拉就最大劑,再多石油都係窮到燶,惡性通脹,貨物短缺,人人走佬。古巴開始姓資,就正常少少,早幾年去都見當地人開始富起來,有民宿,不過坐古巴航空仲係驚驚地,架飛機漏水的。尼加拉瓜直頭有唔少私營企業,唔好同政府作對就得,相對地就最正常。

咁同講香港樓或大陸幼兒園有乜關係?Gloria提出咗一個好簡單嘅論證 : 加拉加斯咁好你唔搬去住?社會主義咁好做乜人人走佬?加拉加斯正係委內瑞拉首都,政府話係社會主義天堂

講到尾行動最實際嘛。所以高官送啲仔女去外國讀書,亦都唔會自己搬上大灣區,中國嘅高官(或仔女)就拎美國國藉。全部都係行動話你知。所以當年毛孟靜講菲律賓點好賓妹寧願留在菲律賓,周顯就話贊助佢去住,正如我見twitter上有啲網友講香港人間地獄慘過乜悲慘世界,仲夠膽話我知 索馬里都比香港有希望,我就真係問佢幾錢人工,我出錢畀佢去住,住到我破產為止。結果佢而家都仲未執完行李,真係漏氣。

所以,香港根本就係宜居之地,period。人人爭住嚟住仲唔係宜居之地?宜唔宜居呢啲相對啫。你覺得好慘,大把人覺得好好。

正如其實我好憎早起身,但以前份工日日七點半返到中環,即係我有時六點未到就起身。係乜軀使我咁做?梗係窮啦。但我仲記得有次我呻辛苦慘過賣籮柚,當時有朋友同我講:其實應該好多人恨不得拎你一半嘅人工去賣籮柚。自此我就記住呢句嘢。記住,你不停抱怨嘅人生,其實係好多人發夢都想像唔到嘅甜美生活La Dolce Vita。不過俱往矣

所以,大陸人仆嚟香港買樓,合理過唔合理。睇咩負擔比率嗰啲根本君在夢中。大陸人呢樣嘢之前咁多個周期都係冇嘅,你拎以前嘅數點去計?

後記:呢個「大陸越仆街香港越掂」論係大有市場的。亦都唔係完全冇證據支持:歷史就係證據。但我好記得十月三日我在北韓返嚟同蕭生(仲有邊個蕭生?)食飯時,佢同大家講佢睇得好淡,以前就係「大陸越仆街香港越掂」,但今次保證一齊仆街。諗下亦都係真,去歸納「大陸越仆街香港越掂」,都係基於一兩次頂多兩三次嘅經驗(國共內戰,文革之類)。唔記得羅素隻雞點死啦?當然咩叫掂,就任佢講。樓價高可以係好掂,樓價爆煲亦可以係好掂。

後後記:姑隱其名,如有得罪有怪莫怪。但Gloria講完,有答問環節,有鬼佬舉手問,「喂你話社會主義點唔好點唔好,但中國令幾多幾多人脫貧喎」,佢一路問我已經皺晒眉頭,同枱都有啲人反反地白眼。大佬呀,中國都社會主義?結果Gloria話佢知:大躍進餓死N咁多人喎! 脫貧正係因為後來改革開放唔再行 社會主義。

原文刊在作者 Medium
作者 Facebook Page

廣告