立即捐款

Momay

我係熱愛足球嘅油漆佬。 網誌

體育

北韓守門員李明國的第一百場波

北韓守門員李明國的第一百場波
廣告

廣告

今日東亞盃對香港係李明國第一百場波。

北韓繼2012年後再次無法進入東亞盃決賽週,而勞改、 礦工、犬決等字眼又出現喺網上,有球迷詢問我,今次北韓球員會受到處罰嗎?

首先,球員踢得唔好會畀政府捉去勞改或掟去做礦工,主要係南韓嘅所謂消息人士透露出嚟,由於無法查證,可能真,亦都可能係假,但我有兩點好肯定,第一點就係教練金永峻非常失望,佢經驗唔夠,但北韓嘅運氣更加唔夠,三場波射罰球都中楣,另外就係把握力問題,三場波佢哋創造咗起碼廿個黄金機會,不過畀班球員浪費晒。完場後佢平壤式踎咗喺到,有波友覺得佢喺嗰刻腳軟企唔穩諗緊點著草好,我唔係佢心入面嗰條蟲,但喺鏡頭所見佢面帶青灰色,其實喺補時階段一個頭鎚如果入咗,面露青灰就會係阿白生,但呢啲咪就係足球。

另一點係門將李明國唔會失蹤,佢係北韓多年來嘅首席門將,但佢已經被傳過多次「將要返國做礦工」,「將會被送入勞改營」,甚至判死刑嘅消息,2010年世界盃佢失咗12球,有媒體估計佢可能從此消失,但之後九成大國腳比賽都係佢擔正,亞洲盃出局又「被死刑」,輸畀菲律賓又被死,輸畀越南又要被死,畀黎巴嫩大炒畀香港迫和東亞盃包尾又話佢會接受死刑,到今日?佢仲生勾勾喺到,咁今次又咩下場呢?

李明國有冇受過罰我唔知,但肯定仲會見到佢踢北韓A隊,因為對比其他北韓門將,佢的確好穩陣。你睇吓班U仔就明白。根據英國嘅theguardian喺2014年為佢做嘅專訪係咁講:(由南非世界盃)返到北韓,北韓隊受到市民熱烈歡迎,李明國亦成為人民英雄。

你又信嗎?

話咁快,踢埋今日呢場佢就為北韓踢咗一百場波,可惜隊友唔爭氣,冇得將出線送畀佢做紀念禮物。

廣告