90年代嘅香港娛樂圈曾經有個「毒瘤明」。「毒瘤明」其實係當時曼受歡迎嘅青少年雜誌《YES!》唱衰劉錫明嘅花名。點解要唱衰劉錫明？因為佢係《YES!》老細倪震嘅情敵。
《YES!》每期都瘋狂唱衰劉錫明，因為影響力大（喺未有Internet同智能電話嘅時代，暢銷雜誌真係有呢個影響力），鍾意聽劉錫明被認為係柒事。劉錫明係咪真係好似《YES!》寫到咁衰，大家無從深究，總之感覺柒就唔會再買佢嘅唱片，咁劉錫明人氣插水，結果要轉進台灣。
網上世界，一樣可以做到毒瘤明效應。只要你隊型夠齊，有KOL發動攻勢，再加上一大堆冇樣嘅account，一見有關於嗰個人或者事件嘅POST就copy & paste留言撩交鬧，到有人被辣著鬧番轉頭講咗啲蠢嘢，佢地就會cap圖貼堂，再由KOL們宣傳。
結果呢？就係成個網絡上嘅氣氛，令你即使想講句公道說話或者表個態支持，都要諗過先。結果就係多人唔敢表態，就算要表態，仲要諗定啲人會點樣嚟砌你，結果要表個態都要寫幾百字戴晒頭盔。最後，個議題就會毒瘤明化，一般人覺得好煩，campaign訊息傳播唔到，咁就會die down。
咁當然啦，大家唔係第一日上網，呢啲手法都見慣見熟，由品牌到議題到選舉，都係咁樣。
我咁講唔係想賴三賴四，而係想提提各位，呢種操作已經玩咗好多年，而且愈玩愈成熟。面對呢種操作，就請更加唔好俾位人入，尤其是有身份嘅人講嘢唔該小心啲，你一次出言不遜，就會俾人loop到你死嗰日，傷害嘅唔只係你，仲有你嘅盟友。
仲有，而家流行嘅操作係所有嘢用人性最陰暗一面去解讀，你講乜都會被故意演譯為什麼勒索什麼綁架，咁冇法子，你唯有好似做心理輔導咁小心講，冇計，你出嚟行，預咗要應付呢啲嘢。
最後，我預咗有人會鬧我將問題怪落去毒瘤明操作手法度，咁我喺度講三次：
失敗有好多因素，有自身因素有外在因素，每個因素都要檢討
失敗有好多因素，有自身因素有外在因素，每個因素都要檢討
失敗有好多因素，有自身因素有外在因素，每個因素都要檢討
我講完了。